पाँच वर्षपछि ‘एक्सिस’

काठमाडौं । सांगीतिक ब्याण्ड ‘एक्सिस’ पाँच वर्षपछि ‘एक्सिस लाइभ इन काठमाडौं’ मार्फत गुञ्जिने भएको छ । पिभिइ नेटवर्कको व्यवस्थापनमा आगामी मंसिर १६ गते शुक्रबार अर्थात् डिसेम्बर २ मा क्लब फरेनहाइटमा एक्सिसले कार्यक्रम गर्न लागेको हो ।

पाँच वर्षअघि एक्सिसले नेपालमा दर्शकको हाउसफूल उपस्थितिमा कन्सर्ट गरेको थियो । यो कन्सर्टपछि एक्सिसले नेपालबाहिर धेरै सफल कार्यक्रम गरेर दर्शकलाई मनोरञ्जन दिएको थियो । पिभिइ नेटवर्कका अनुसार एक्सिसको प्रस्तुतिअघि झिल्के एण्ड द कम्पनीले दर्शकलाई झुमाउनेछ । पिभिइले प्रायोजक, कलाकार, इभेन्ट मेनेजमेन्ट कम्पनी, प्रोडक्सट टिम र मनोरञ्जनका अन्य क्षेत्रलाई नयाँ अनुभव दिन कार्यक्रम गर्न लागेको जनाएको छ ।

नेपालमै पहिलोपटक लाइट, साउण्ड, एलइडी, क्यामरादेखि कलाकारको कोरियोग्राफीमा सम्बन्धित क्षेत्रका विज्ञको डिजाइनमा सेट तयार पारिनेछ । कार्यक्रमको प्रि–सेल्स टिकट सबै सोल्ड आउट भएको छ र कार्यक्रमका लागि १ हजार र १५ सय टिकट मूल्य निर्धारण गरिएको छ । एक्सिसको स्थापना सन् २००३ मा भएको हो । विश्व अनलाइन स्ट्रिम प्लेटफमको रेङ्किङ अनुसार नेपालभरिको बेण्ड क्याटेगोरीमा नेपथ्य, १९७४ एडी, अल्बट्रस र द एज भन्दा पहिलो स्थानमा एक्सिस रहेको छ । बार, क्लब र रेस्टुरेन्टमा गीत नगाउने यो ब्याण्डले पहिलोपटक क्लब फरेनहाइटमा क्लोज इभेन्टमा प्रस्तुति दिँदैछ ।

ब्याण्डले हालसम्म ‘ब्ल्याक एण्ड ह्वाइट (२००४)’, ‘माफ गरिदेउ (२००९)’, र ‘गाउँघर (२०१७)’ गरी तीन एल्बम सार्वजनिक भइसकेका छन् ।

यस्तै, सन् २०१९ मा स्थापना भएको इन्डी रक ब्याण्ड झिल्के एण्ड द कम्पनीलाई दर्शकले निकै मनपराएका छन् । यो ब्याण्ड पछिल्लो पटक युवा दर्शकको रोजाइमा परेको छ । यो ब्याण्डका ‘पंक्षीहरु’, ‘मलाई केही आउँदैन’, ‘निलो सुटकेस’ र ‘झिल्के फायर’ गीत छन् । यो ब्याण्डले गत जुनमा ‘जवानीको जोश’ नामको एल्बम बजारमा ल्याएको थियो ।