प्रतिपक्षीदलहरू बहुमतको सरकार गठन गर्न असफल भएपछि नेपालको संविधानअनुसार सबैभन्दा ठूलो पार्टीको संसदीयदलको नेताका हैसियतले एमाले अध्यक्ष केपी शर्मा ओली यही वैशाख ३० गते फेरी प्रधानमन्त्री नियुक्त भएका छन् । जेठ २८ गतेभित्र उनले प्रतिनिधिसभाबाट विश्वासको मत लिनुपर्नेछ । यदि लिन सकेनन् भने के हुन्छ ? भन्ने प्रश्नको उत्तर लगभग स्पष्ट छ । बहुमतीय सरकार गठन हुन नसकिरहेको अवस्थामा अल्पमतको प्रधानमन्त्रीले विश्वासको मत लिन सकेन भने लोकतन्त्रको संरक्षणका लागि मध्यावधि निर्वाचन अपरिहार्य छ । प्रधानमन्त्री ओलीले बहुमत पुर्याउने प्रयास गर्लान कि, मध्यावधि निर्वाचनको बाटो रोज्लान् ? भन्ने खुल्दुली यतिबेला सबैलाई छ । यी दुबै विकल्प प्रधानमन्त्री ओलीको हितमा छन् । बहुमत पुर्याए भने अब डेढ वर्ष उनी अविछिन्न प्रधानमन्त्री बन्नेछन् । पूरा कार्यकाल सरकार चलाएको पहिलो रेकर्ड ओलीले नेपालको लोकतान्त्रिक इतिहासमा कायम गर्नेछन् । यदि मध्यावधि निर्वाचनमा जाने बाटो रोजे भने ओलीले गत पुस ५ गते चालेको कदमको औचित्य पुष्टि हुनेछ । पुस ५ गते चालेको कदमको औचित्य पूरा हुनु भनेको प्रधानमन्त्री ओलीका लागि निकै ठूलो विजय हो । तर, मध्यावधिमा जाँदा ओलीको व्यक्तिगत जित भए पनि मुलुकले हार्छ । पहिलो कुरा त कोरोनाका कारण धेरै नै असहज बनेको अवस्थामा मध्यावधि निर्वाचनमा धकेल्नु मुलुकको हितमा हु“दैन । दोस्रो कुरा संविधानसभाद्वारा बनेको संविधानअन्तर्गत गठित पहिलो प्रतिनिधिसभाको अकालमा मृत्यु हुनु भनेको गलत नजीर बस्नु हो ।
संविधानअनुसार जेठ १५ गते बजेट पेस गर्नुपर्छ । त्यसअघि नै नीति तथा कार्यक्रम पेस गरिसक्नुपर्छ । संसद्मा प्रिबजेट छलफल गर्ने प्रावधान पनि छ । त्यसैले संसद्को वर्षे अधिवेशन बोलाउन ढिलाइ भइसकेको छ । प्रधानमन्त्री ओलीका लागि विश्वासको मत लिने अधिकतम समय जेठ २८ गतेसम्म छ । तर, त्यतिन्जेलसम्म पर्खने छुट उनलाई छैन । नीति तथा कार्यक्रम एवं बजेटमै प्रधानमन्त्री ओलीले बहुमत सिद्ध गर्नुपर्छ । नीति तथा कार्यक्रम संसद्को बहुमतले पास नभई बजेट प्रस्तुत गर्न मिल्दैन । नीति तथा कार्यक्रम पारित हुनु भनेको प्रधानमन्त्रीको बहुमत सिद्ध हुनु हो । नीति तथा कार्यक्रम पास नहुनु भनेको प्रधानमन्त्रीको बहुमत छैन भन्ने औपचारिक रूपमा पुष्टि हुनु हो । त्यसैले जेठ १४ अघि नै प्रधानमन्त्री ओलीले विश्वासको मत लिइसक्नुपर्नेछ ।
प्रतिपक्षीदलहरूका लागि पनि अब धेरै विकल्प बाँकी छैनन् । कि त एकढिक्का बनेर बहुमतको सरकार गठन गर्न तयारीका साथ बस्नुपर्छ । कि त सरकारले ल्याउने नीति तथा कार्यक्रमका पक्षमा मतदान गरिदिनुपर्छ । कि त मध्यावधि निर्वाचनका लागि तयार रहनुपर्छ । मधेसीदलमा प्रकट भएको विवाद हेर्दा प्रतिपक्षीदलहरूले बहुमतको सरकार दिनसक्ने अवस्था देखिन्न । ओली सरकारले ल्याएको नीति तथा कार्यक्रमलाई ०७५ सालमा प्रमुख प्रतिपक्षीदल नेपाली कांग्रेसले साथ दिएको नजीर छ । यदि, मध्यावधि निर्वाचन चाहँदैन भने नेपाली कांग्रेसले अहिले पनि साथ दिन्छ । कांग्रेस नै मध्यावधि निर्वाचनका लागि इच्छुक हो भने त थप टिप्पणी गर्नु जरुरी रहेन । कोभिडको महामारी मत्थर हुँदै गयो भने मंसिरमा मध्यावधि निर्वाचन अव्यावहारिक हुँदैन । महामारीको यही रफ्तार मंसीरसम्म जारी रह्यो भने मुलुक तहसनहस हुने निश्चित छ । कोभिडसँग लड्न सबै दल एकजुुट हुनुपर्ने अहिलेको आवश्यकता हो । संभव भए त राष्ट्रिय सहमतिको सरकार गठन गर्नसके धेरै उत्तम हुन्छ । प्रतिनिधिसभा र प्रदेशसभाका गरी करिव एक दर्जन सिटमा उपनिर्वाचन गर्नुपर्ने नै छ । एक वर्षे कार्यकालका लागि यतिका सिटमा उपनिर्वाचन गराउनुभन्दा पा“च वर्षे कार्यकालका लागि आमनिर्वाचन गराउने विकल्प खराब होइन ।
प्रतिक्रिया