जिल्लाका किसानलाई पशु अभिमुखीकरण

स्याङ्जा । जिल्लाको गल्याङ नगरपालिकामा स्वास्थ तथा सफा दूध उत्पादनका लागि अभिमुखीकरण कार्यक्रम सुरु भएको छ । गल्याङ नगरपालिका पशु सेवा शाखाको आयोजनामा दूध उत्पादक अगुवा कृषकहरूका लागि अभिमुखीकरण तालिम दिइएको हो । कार्यक्रममा गल्याङ नगरपालिका प्रमुख भूपराज अधिकारीले विकासको पहिलो पूर्वाधार सक्षम र सचेत नागरिक भएको बताए । उनले सक्षम र सचेत नागरिक हुनका लागि स्वस्थ्य खानाको आवश्यकता रहेकोमा जोड दिए । ‘बाटो खन्ने कुरा र आमा समूहको भवन बनाउने कुरा मात्रै विकास होइन, स्वस्थ हुने कुरा नै विकास हो,’ अधिकारीले भने । नगरप्रमुख अधिकारीले दुधै दूधको सेतो नगर बनाउने अभियानमा गल्याङ नगरपालिका लागिरहेको पनि बताए ।

दैनिक १० हजार लिटर दूध उत्पादन गरी गल्याङ बाहिर पठाउने अभियानमा रहेको भन्दै उनले सबै किसानको सकारात्मक साथ पाइरहेको अधिकारीले बताए । उनले भने, ‘पहिले दूध किनेर खानुपर्ने अवस्था रहेकोमा अहिले दैनिक दुई हजार लिटर दूध दैनिक रूपमा बाहिर पठाउन सक्नु ठूलो उपलब्धी हो । यसलाई अझै बढाउन जरुरी छ ।’  आफू मेयर भएपछि कृषि र पशुमा लगानी गर्ने कुरा गर्दै गर्दा धेरैले हाँसोमा उडाउने गरेको स्मरण गर्दै नगरप्रमुख अधिकारीले अहिले दूध उत्पादन बढ्दा सात सय जनाले प्रत्यक्ष रोजगार पाएको र अप्रत्यक्ष रूपमा त्यति नै संख्यामा रोजगारीमा रहेको बताए ।

१० हजार लिटर दूध उत्पादन भएमा त्यसबाट झण्डै चार हजार जनाले प्रत्यक्ष तथा अप्रत्यक्ष रूपमा रोजगारी र स्वारोजगारीमा संलग्न हुने नगरपालिकाको योजना छ । कार्यक्रममा प्रमुख प्रशासकीय अधिकृत भीमप्रसाद तिवारीले नगरपालिकाले सुरु गरेको कृषि र पशुको कार्यक्रमले आफू निकै प्रभावित भएको बताए । उनेल भने, ‘नगरपालिकाले जे कुरामा जोड दिनुपर्ने थियो, त्यही कुरामा जोड दिएको रहेछ, म निकै खुसी भएको छु ।’

विकासका लागि कृषि र पशुपालनमा विशेष अनुदान र लगानी गर्नुको विकल्प नभएको भन्दै गल्याङ नगरपालिकाले दूधमा प्रतिलिटर १५ रुपैयाँ अनुदानको व्यवस्था गर्नु प्रशंसनीय रहेको बताए ।  कार्यक्रममा गल्याङ नगरपालिका पशु सेवा शाखा प्रमुख सुशील अर्यालले किसानहरूले स्वस्थ्य र सफा दूध उत्पादनमा जोड दिनका लागि अभिमुखीकरण कार्यक्रम सञ्चालन गरिएको बताए ।

कार्यक्रमको सहजीकरण गरिरहेको संस्था श्रीनगर एग्रिटेक इन्डस्ट्रिज प्रालि सुनौलो दानाका डाक्टर विनोद गुप्ताले गल्याङ नगरपालिकाले गरिरहेको कृषि र पशु कार्यक्रमले आफू निकै उत्साहित भएको बताए । अभिमुखीकरण कार्यक्रम सोमबारसम्म सञ्चालन हुनेछ ।