विश्वकप २०२६ : नयाँ पुस्ताका २० सम्भावित सुपरस्टार

काठमाडौँ । विश्वकप फुटबल २०२६ ले यसपटक कीर्तिमानी रूपमा १ हजार २४८ खेलाडीलाई मैदानमा उतार्दै छ । संयुक्त राज्य अमेरिका, क्यानडा र मेक्सिकोले संयुक्त रूपमा आयोजना गर्ने यो विश्वकपमा धेरैजसो खेलाडीहरू पहिलोपटक विश्वकपको ठुलो मञ्चमा देखिन लागेका छन् । तीमध्ये करिब ८९१ खेलाडी आफ्नो पहिलो विश्वकप खेल्दै छन्, जसले प्रतियोगितालाई अझ रोचक र प्रतिस्पर्धात्मक बनाउने अपेक्षा गरिएको छ । बिबिसी स्पोर्टका टिभी तथा रेडियो टिप्पणीकारहरूले युरोप, अफ्रिका, एसिया र अमेरिकाका विभिन्न क्लबहरूमा खेलिरहेका २० उदाउँदा प्रतिभाशाली खेलाडीहरूको सूची तयार गरेका छन्, जसले यस समरमा विश्व फुटबलमा आफ्नो छाप छोड्न सक्ने अनुमान गरिएको छ ।

यस सूचीमा सबैभन्दा ध्यान आकर्षित गर्ने नामहरूमा आइभरी कोस्टका १९ वर्षीय विंगर यान डियोमान्डे, मेक्सिकोका १७ वर्षीय मिडफिल्डर गिल्बर्टो मोरा र स्विट्जरल्यान्डका युवा मिडफिल्डर जोहान मन्जाम्बी रहेका छन् । डियोमान्डे जर्मन क्लब आरबी लाइपजिगमा खेल्दै उत्कृष्ट प्रदर्शन गरिरहेका छन् । उनले बुन्डेसलिगामा ३३ खेलमा १२ गोल र ९ असिस्ट गर्दै क्लबलाई च्याम्पियन्स लिगमा स्थान दिलाउन ठुलो योगदान दिएका छन् । चोटका कारण केही अन्तर्राष्ट्रिय खेल छुटे पनि उनी आइभरी कोस्टको प्रमुख आशाका रूपमा हेरिएका छन् ।

मेक्सिकोका गिल्बर्टो मोरा भने मात्र १७ वर्षको उमेरमै राष्ट्रिय टोलीमा प्रवेश गरेर इतिहास रचिसकेका छन् । उनले १५ वर्षको उमेरमै लिगमा गोल गर्दै सबैभन्दा कान्छा गोलकर्ता बनेका थिए । घरेलु समर्थकहरू उनको प्रदर्शनमा ठुलो आशा राखिरहेका छन् । स्विट्जरल्यान्डका जोहान मन्जाम्बी युरोपा लिगमा फ्राइबर्गलाई फाइनलसम्म पु¥याउने क्रममा उत्कृष्ट खेलाडीका रूपमा उदाएका थिए । उनी मिडफिल्डमा बहुमुखी भूमिका निभाउन सक्ने खेलाडी हुन्, जसले आक्रमण र रक्षा दुवैमा योगदान दिन सक्छन् ।

अमेरिकाका लागि पिएसभी आइन्धोभेनका स्ट्राइकर रिकार्डो पेपी विशेष आशाका केन्द्र हुन् । उनले डच लिगमा १९ गोल गर्दै क्लबलाई उपाधि जिताउन मद्दत गरेका थिए । अमेरिकी टोलीले घरेलु मैदानको फाइदा उठाउँदै राम्रो प्रदर्शन गर्ने अपेक्षा गरिएको छ । मेक्सिकोका अर्का स्ट्राइकर आर्मान्डो गोन्जालेज पनि भविष्यका स्टार मानिन्छन् । उनले गत सिजन २५ गोल गर्दै घरेलु लिगमा उत्कृष्ट प्रदर्शन गरेका थिए र राष्ट्रिय टोलीमा समेत गोल गर्न सफल भएका छन् । त्यस्तै, ब्रायन गुटिएरेजले पनि मिडफिल्डमा सिर्जनात्मक भूमिका निर्वाह गर्दै मेक्सिकोको आक्रमणलाई सन्तुलित बनाइरहेका छन् ।

इटालीको कोमो क्लबका निको पाज अर्जेन्टिनाका लागि महत्वपूर्ण खेलाडी बन्न सक्ने अनुमान गरिएको छ । उनी ड्रिब्लिङ, पासिङ र आक्रमण निर्माणमा दक्ष छन् । टर्कीका कान उजुन फ्रान्कफर्टमा प्रभावशाली सुरुआत गरे पनि चोटका कारण निरन्तरता पाउन सकेका छैनन्, तर उनको क्षमता उच्च मानिन्छ । क्रोएसियाका लुका भुस्कोभिक टोटनह्यामका लागि भविष्यका प्रमुख डिफेन्डरका रूपमा हेरिएका छन् । बेल्जियम र जर्मनीमा लोनमा खेल्दै उनले अनुभव बटुलेका छन् ।

मोरक्कोले यसपटक पनि युवा प्रतिभामा ठुलो भरोसा गरेको छ । गेसिम यासिन र आय्युब बाउड्डी दुवै खेलाडीले युरोपेली क्लबमा राम्रो प्रदर्शन गरिरहेका छन् । बाउड्डी विशेष रूपमा डिफेन्सिभ मिडफिल्डमा खेल नियन्त्रण गर्ने क्षमताका कारण चर्चित छन् । अल्जेरियाका हौसम आउआर र इब्राहिम माजा पनि टिमका प्रमुख खेलाडीका रूपमा देखा परिरहेका छन् । आउआरले साउदी लिगमा उत्कृष्ट प्रदर्शन गर्दै आफ्नो पुरानो लय फिर्ता पाएका छन् ।

अस्ट्रेलियाका लुकास हेरेन्टन र एलेसान्द्रो सर्कातीले पनि आफ्नो डिफेन्सिभ क्षमताले ध्यान तानेका छन् । सर्काती त इटालीको युवा प्रणालीबाट विकसित भएर अहिले अस्ट्रेलियाका कप्तानसमेत बनिसकेका छन् । इराकका अली जासिम र अल्जेरियाका मोहम्मद अमौरा पनि आक्रमणमा खतरनाक खेलाडीका रूपमा चिनिन्छन् । कोलम्बियाका लुइस सुआरेज (उरुग्वेयन स्टारसँग नाम मिल्ने भए पनि फरक खेलाडी) ले पोर्चुगल लिगमा ३८ गोल गर्दै उत्कृष्ट प्रदर्शन गरेका छन् ।

यी सबै खेलाडीहरूको विशेषता के हो भने उनीहरू आ–आफ्नो क्लबमा पहिले नै प्रभाव जमाइसकेका छन्, तर विश्वकप जस्तो ठुलो मञ्चमा अझै आफूलाई प्रमाणित गर्न बाँकी छ । विशेषगरी युवा खेलाडीहरू जस्तै डियोमान्डे, मोरा, मन्जाम्बी र पाजजस्ता खेलाडीहरूले यदि आफ्नो क्षमताअनुसार प्रदर्शन गरे भने उनीहरू विश्व फुटबलका नयाँ सुपरस्टार बन्न सक्छन् । त्यस्तै, अनुभवी तर अझै पूर्ण रूपमा विश्वस्तरमा स्थापित नभएका खेलाडीहरूले पनि यो प्रतियोगितालाई आफ्नो करियर परिवर्तन गर्ने अवसरका रूपमा प्रयोग गर्न सक्छन् ।

विश्वकप २०२६ केवल अनुभवी खेलाडीहरूको प्रतिस्पर्धा मात्र होइन, नयाँ प्रतिभाको उदयको पनि ठुलो मञ्च हुनेछ । बिबिसी स्पोर्टले चयन गरेका यी २० खेलाडीहरूले आगामी महिनाहरूमा विश्व फुटबलको दिशा नै बदल्न सक्ने क्षमता राख्छन् । यदि उनीहरूले अपेक्षाअनुसार प्रदर्शन गरे भने यो विश्वकप नयाँ पुस्ताका सुपरस्टार जन्माउने ऐतिहासिक प्रतियोगिता बन्न सक्ने जानकारहरूको भनाइ छ ।