काठमाडौँ । नेपाल पर्यटन बोर्ड र इटहरी उपमहानगरपालिकाको सहकार्यमा छैटौँ ‘इस्टर्न ट्राभल मार्ट’ शनिबारदेखि इटहरीमा सुरु भएको छ । कोसी प्रदेशका पर्यटकीय सम्भावनालाई अन्तर्राष्ट्रिय बजारसँग जोड्ने लक्ष्यसहित सुरु भएको यो मार्ट ३ दिनसम्म सञ्चालन हुने बोर्डले जनाएको छ ।
कार्यक्रमको उद्घाटन गर्दै कोसी प्रदेशका पर्यटन, वन तथा वातावरणमन्त्री भीम पराजुलीले कोसी प्रदेश प्राकृतिक, सांस्कृतिक र धार्मिक हिसाबले अत्यन्त समृद्ध रहेको बताए । उनले भने, ‘कोसी प्रदेश नेपालको पर्यटनको ‘गेटवे’ बन्ने क्षमता राख्छ । हामी यसलाई योजनाबद्ध रूपमा विकास गर्दै अन्तर्राष्ट्रियस्तरमा स्थापित गर्ने दिशामा अघि बढिरहेका छौँ ।’ मन्त्री पराजुलीले जैविक विविधता, सिमसार क्षेत्र र वन्यजन्तु पर्यटनका दृष्टिले पनि यो प्रदेश सम्पन्न भएको उल्लेख गरे ।
उनले भने, ‘संसारको सबैभन्दा अग्लो हिमाल सगरमाथादेखि समुद्री सतहबाट होचो स्थानमा रहेको कचनकवलसम्म यही प्रदेशमा पर्दछन । यहाँको पर्यटनको अन्तर्राष्ट्रिय बजारमा प्रवद्र्धन गर्न प्रदेश सरकारले पर्यटन पूर्वाधार विकास, लगानी तथा नीति सहजीकरणमा निरन्तर काम गरिरहेको छ । आगामी दिनमा पनि पर्यटन विकासका लागि आवश्यक सहजीकरण गर्ने प्रतिबद्धता व्यक्त गर्दछु ।’ संस्कृति, पर्यटन तथा नागरिक उड्डयन मन्त्रालयका सचिव मुकुन्दप्रसाद निरौलाले मार्ट पूर्वी नेपालको पर्यटन प्रवद्र्धनका लागि प्रभावकारी मञ्च बन्ने विश्वास व्यक्त गरे ।
उनले भने, ‘हामी पर्यटनलाई अर्थतन्त्रको प्रमुख आधारका रूपमा अगाडि बढाइरहेका छौँ । १६औँ आवधिक योजना र ‘नेपाल पर्यटन दशक’ अभियानमार्फत पर्यटनलाई रोजगारी र आय वृद्धिको मुख्य माध्यम बनाइँदै छ ।’ सचिव निरौलाले पूर्वीनेपालको पर्यटन अब सम्भावनाको चरणमा मात्र छैन, कार्यान्वयनको चरणमा प्रवेश गरिसकेको उल्लेख गर्दै इस्टर्न ट्राभल मार्टजस्ता मञ्चहरूले यसलाई अन्तर्राष्ट्रिय बजारमा कोसीलाई चिनाउने आधार तयार गरेको बताए ।
नेपाल पर्यटन बोर्डका प्रमुख कार्यकारी अधिकृत दीपकराज जोशीले पर्यटनलाई संस्कृति, अर्थतन्त्र र मानिसलाई जोड्ने माध्यमको रूपमा व्याख्या गर्दै पूर्वी नेपाललाई साहसिक, सांस्कृतिक र प्राकृतिक पर्यटनको महत्वपूर्ण केन्द्र भएको बताए । उनले मकालु, कञ्चनजंगा क्षेत्रका पदमार्ग, इलामका चिया बगान, धार्मिक स्थलहरू र साहसिक गतिविधिहरूले पूर्वी नेपाललाई अन्तर्राष्ट्रिय बजारमा प्रतिस्पर्धी बनाउन सक्ने बताए ।
नेपाल एसोसिएसज अफ टुर एन्ड ट्राभल्स नाटा कोसी प्रदेशका अध्यक्ष तथा मार्ट संयोजक पूण्यप्रसाद भट्टराईले मार्टको उद्देश्य सीमा क्षेत्रका पर्यटन व्यवसायीहरूलाई एउटै प्लेटफर्ममा ल्याई व्यापार विस्तार गर्नु रहेको बताए । बोर्डका वरिष्ठ निर्देशक हिक्मतसिंह ऐरलाई पर्यटन क्षेत्रमा महत्वपूर्ण योगदान पु¥याएको भन्दै सम्मान गरिएको थियो । वरिष्ठ निर्देशक ऐरले नेपालको पूर्वी क्षेत्रको पर्यटन प्रवद्र्धनसहित देशभरका सातै प्रदेशमा ट्राभल मार्ट सुरु गरेका थिए । यसले सीमावर्ती पर्यटन बजारलाई जोड्न महत्वपूर्ण कडीका रूपमा लिइएको छ ।
कार्यक्रममा भारतीय दूतावासका प्रथम सचिव नारायण सिंहलगायत भारत र भुटानबाट आएका पर्यटन व्यवसायीहरूको उल्लेखनीय सहभागिता रहेको छ । आयोजकका अनुसार भारतका बंगाल, विहार र सिक्किम तथा भुटानबाट १०० भन्दा बढी अन्तर्राष्ट्रिय पर्यटन व्यवसायीको सहभागिता र नेपालका विभिन्न प्रदेशबाट ५० भन्दाबढी व्यवसायी सहभागी भएका छन् । मार्ट आगामी १६ चैतसम्म सञ्चालन हुने बोर्डले जनाएको छ ।
प्रतिक्रिया