अर्थबजार

कुखुरामा रानीखेत रोगबाट लाखौँको क्षति

सौर्य अनलाइन २०७५ पुष २७ गते १२:१४ मा प्रकाशित

डोटी । कुखुरामा देखिने रानीखेत नामक रोगका कारण डोटीका एक कुखुरा व्यवसायीलाई लाखौँको क्षति भएको छ । जिल्लाको दिपायल सिलगढी नगरपालिका ५ पुन्नामा डिल्लीराज भट्टले सञ्चालन गर्दै आएको कुखुरा फार्ममा रहेका लेयर्स जातका ७०० कुखुरा रोगका कारण मरेका छन् । रु १२ लाख खर्च गरी सञ्चालन गर्दै आएका भट्टको पोल्टी फार्ममा कुखुरामा रोगको प्रकोप देखिएको हो ।

कुखुरा झोक्राउने, टाउको घुमाउने, मुखबाट फिँज फाल्नेजस्ता लक्षण देखिएको भट्टले जानकारी दिए । यस्तो लक्षण देखिएको करीब दुई घण्टाभित्रै कुखुरा मर्ने गरेका छन् । अण्डा उत्पादन गर्नका लागि पालिएको कुखुराले तीन महीना पहिलेदेखि मात्र अण्डा दिन थालेको थियो । करीब १८ महीनासम्म अण्डा दिने कुखुरा मरेपछि भट्ट चिन्तित बनेका छन् । एउटा खोरमा रहेका एक हजार कुखुरामध्ये करीब ३०० कुखुरा मात्र बाँकी रहेको भट्टले बताए ।

रोगको आक्रमण भएपछि कुनै उपचार सम्भव नभएको पशु चिकित्सकले बताएका छन् । पुन्ना क्षेत्रमा मात्र अन्य व्यवसायीले पनि कुखुरापालन गरी रहेकाले सावधानी अपनाउनका लागि पशु सेवा एकाइले सबैमा आग्रह गरेको छ ।

प्रतिक्रिया

पछिल्ला अपडेट्स

लोकप्रिय