कल्याणकारी सेवाको लागि राष्ट्रिय भेला

काठमाडौं, २३ चैत । सैनिक कल्याणकारीकोषबाट सेवा लिने वहालवाला, भूतपूर्व सैनिक एवं परिवारका प्रतिनिधिहरूको राष्ट्रिय भेला सैनिक मुख्यालय जंगी अड्डामा सुरु भएको छ ।

नेपाली सेना कल्याणकारी बोर्डद्वारा आयोजित उक्त राष्ट्रिय भेलामा बोर्डमातहत रहेका जिल्ला, अञ्चल र क्षेत्रका प्रतिनिधिका साथै सम्पर्क व्यक्तिसहित गरी २ सय जनाको सहभागिता छ । कल्याणकारी कार्यक्रमको पहुँच र प्रभावकारीतालाई बढाउँदै वहालवाला, अवकास प्राप्त तथा आश्रित परिवारको घरदैलोसम्म कार्यक्रम र योजना लागू गर्ने उद्देश्यले छलफलका लागि २ दिने राष्ट्रिय भेला आयोजना गरिएको हो ।

सेनाले कल्याणकारी बोर्डमार्फत आफ्ना वहालवाला एवं भूपू सैनिक र परिवारजनको जीवनस्तरमा सुधार ल्याउन सहुलियत ब्याजदरमा कर्जा प्राप्त गर्ने व्यवस्था मिलाएको छ । पछिल्लो समय बोर्डले नेपाल इन्भेस्टमेन्ट बैँकसँगको साझेदारीमा गरेर हिताधिकारीलाई व्यक्तिगत र सामूहिकरूपमा लघुवित्त, घरनिर्माण कर्जा र कृषि सहकारी सञ्चालनका लागि ४ दशमलव ५ प्रतिशत व्याजमा ऋण प्रदान गर्दै आएको छ ।

गएको फागुन मसान्तसम्ममा १० हजार ४ सय ७८ जना हिताधिकारी लघुवित्त कार्यक्रमा सहभागी भएकोमा उनीहरूलाई १ अर्ब ४३ करोड रुपैयाँ लगानी भइसकेको छ । सो कार्यक्रममा घरकर्जा र युवा कृषि स्वरोजगारलाई पनि समेटिएको सेनाले जनाएको छ । ‘यो आर्थिक वर्षभित्रै १५ हजार व्यक्तिलाई लघुवित्त कार्यक्रममा समावेश गराउने र २ अर्ब रुपैयाँ कर्जा प्रवाह गर्ने योजना रहेको छ’ बोर्डका कार्यकारी अधिकृत एवं अवकास प्राप्त रथी चित्रबहादुर गुरुङले भने ।

कल्याणकारी कोषको अभिवृद्धि र सबै हिताधिकारीको बृहत्तरहितको लागि दुरगामी दृष्टि, लक्ष्य, रणनीति र ठोस प्रयासका साथै लक्षित समुदायमा विस्तार गर्न भूपूको बाहुल्यता रहेका ५३ जिल्लामा पुगेर अन्तत्र्रिmया गरिएको उनले बताए ।

आगामी ५ वर्षभित्रमा बहालवाला, भूपू सैनिक र तिनका आश्रित परिवार गरी ४५ हजारलाई लघुवित्तमार्फत ५ अर्ब रुपैयाँ लगानी गर्ने महत्वपूर्ण कार्ययोजना सेनाले अघि सारेको छ । मुलुकमा अहिले ६७ हजार ५ सयको हाराहारीमा भूपू सैनिक र आश्रित परिवारजन छन् भने नेपाली सेना ९६ हजार जनशक्ति भएको प्रमुख सुरक्षा संगठन हो । नेपाली सेनाले भूपू सैनिक सम्मेलन ३÷३ वर्षमा गर्ने कार्ययोजनासमेत अघि सारेको छ ।

सैनिक कल्याणकारी कोषबाट वहालवाला, अवकास प्राप्त सैनिक एवं तिनका परिवारको बृहतरहितको लागि स्वास्थ्य, शिक्षा, आर्थिक अनुदान, परिवार आवास गृह, सैनिक महाविद्यालय जस्ता कल्याणकारी कार्यक्रम सञ्चालनमा रहेका छन् । नेपाली सेनाले स्वास्थ्य विज्ञान संस्थान, व्यावसायिक तालिम संस्थान, कल्याणकारी बोर्डसमेत सञ्चालन गर्दै आएको छ भने त्रिचन्द्र मिलिटरी हस्पिटल पनि सञ्चालन गरिरहेको छ । सैनिक कल्याणकारी कोषको मूल पुँजीबाट आर्जित ब्याज र लगानीबाट प्राप्त प्रतिफल नै कल्याणकारी कार्यको एक मात्र भरपर्दाे स्रोत हो ।

सैनिक कल्याणकारी कोषमा लगानी गरिएको ३ अर्ब ९३ करोड, ९८ लाख ९० हजार रुपैयाँसमेत गरी फागुन मसान्तसम्ममा ३४ अर्ब ९० करोड ४५ लाख ४६ हजार रुपैयाँ पुगेको छ । सो कोषबाट हालसम्म ८ लाखभन्दा बढीले सेवा तथा सुविधा प्राप्त गरिसकेको नेपाली सेनाले जनाएको छ ।

कल्याणकारी बोर्डमार्फत प्रदान गरिँदै आएको सेवालाई थप प्रभावकारी तुल्याउन सरकारको नीतिगत र आर्थिक सहयोगको लागि आवश्यक अध्ययन र समन्वय हँुदै आएको सेनाले जनाएको छ । सेनाले गत वैशाखमा गएको भूकम्पमा परी मृत्यु, बेपत्ता तथा भौतिक क्षति बेहोरेका वहालवाला तथा अवकास प्राप्त गरी ५३ हजार ७ सय ७५ जनालाई राहत स्वरूप कल्याणकारी कोषबाट २ अर्ब ४९ करोड ५ लाख ५७ हजार रकम प्रदान गरेको थियो ।

राष्ट्रिय भेलाको उद्घाटन गर्दै प्रधानसेनापति राजेन्द्र क्षत्रीले राष्ट्रिय स्वतन्त्रता, सार्वभौमसत्ता, भौगोलिक अखण्डता, स्वाधीनता र राष्ट्रिय एकताको रक्षाका लागि संविधानप्रति प्रतिवद्धरही राष्ट्रियहितको संरक्षण, सम्वद्र्धन तथा प्रवद्र्धनको लागि नेपाली सेना सदा समर्पित रहदै आएको बताए ।

‘कल्याणकारी कोषका हिताधिकारीलाई सहयोग तथा सुविधा प्रदान गर्ने सम्बन्धमा संगठनबाट थप चिन्तन र अध्ययन हँुदै आएको छ’, उनले भने । समारोहमा वहालवाला सैनिकलाई लघुवित्त सञ्चालन गर्न अन्यन्तै न्यून व्याजमा ऋण प्रदान गरिएको चेक हस्तान्तरण गरिएको थियो ।