खेल-खेलाडी

तेस्रो क्लब टिम बुद्धिचाल हुने

सौर्य अनलाइन २०७० जेठ ८ गते २३:३१ मा प्रकाशित

काठमाडौं, ९ जेठ । मनमोहन स्मृति तेस्रो राष्ट्रिय क्लब टिम बुद्धिचाल प्रतियोगिता ७ देखि १२ असारमा  ललितपुरमा हुने भएको छ । मनमोहन स्मृति चेस एकेडेमी, सानेपाको आयोजनामा र ललितपुर जिल्ला सहकारी संघको सह–प्रायोजनमा सञ्चालन हुने प्रतियोगिता लिग कम नकआउट आधारमा खेलाइनेछ ।
प्रतियोगिता सात चरणको स्वीस लिग हुनेछ भने त्यसपछि उत्कृष्ट चार टिमबीच नकआउट खेल हुनेछ । प्रतियोगिता सफलतापूर्वक सम्पन्न गर्नका लागि रघुनाथ महर्जनको संयोजकत्वमा १५ सदस्यीय आयोजक कमिटी गठन गरिएको छ ।
विश्व बुद्धिचाल महासंघ फिडे र नेपाल बुद्धिचाल संघको स्वीकृतिमा रेटिङसहित हुन लागेको यस प्रतियोगितामा जिल्ला बुद्धिचाल संघहरूबाट टिमको सहभागिता अनिवार्य गरिएको र क्लबले एकजना विदेशी खेलाडी सहभागी गराउनसक्ने आयोजक सदस्य तथा नेपाल बुद्धिचाल संघका सचिव हेराकाजी महर्जनले बताए ।
प्रतियोगिताको पुरस्कार राशि एक लाख तीस हजार रहेको छ  । विजेता टोलीलाई पचास हजार, उपविजयीलाई तीस हजार, तेस्रो हुनेलाई बीस हजार र चौथौलाई दश हजार रुपियाँ प्रदान गरिनेछ । त्यस्तै हरेक बोर्डमा उत्कृष्ट चार जनाले जनही पाँच हजार नगद प्राप्त गर्नेछन् ।
प्रतियोगितामा देशभरबाट ४० क्लब टिम सहभागी हुनेछन् । प्रतियोगितामा उपत्यका बाहिरबाट आउने टोलीका लागि नि:शुल्क आवासको व्यवस्था गरिएको छ । प्रतियोगिता सञ्चालनार्थ चार लाख तीस हजार खर्च लाग्ने अनुमान गरिएको छ ।

प्रतिक्रिया

पछिल्ला अपडेट्स

लोकप्रिय