नागढुंगा–नौबिसे सडक दैनिक साढे चार घण्टा बन्द हुने

काठमाडौं । संघीय राजधानीको प्रदेशविन्दु नागढुंगा–­नौबिसे सडक आजदेखि हरेक दिन दिउँसो साढे चार घण्टा बन्द हुने भएको छ ।

नारायणगढ–मुग्लिन सडक योजना (पूर्वी खण्ड) ले आजदेखि यही जेठ २५ गतेसम्म बिहान १०ः३० बजेदेखि अपाह्न ३ः०० बजेसम्म उक्त सडक बन्द गरेर काम थालेको जनाएको छ ।

काठमाडौंका प्रमुख जिल्ला अधिकारी ऋषिराम तिवारीले काठमाडौं र धादिङ जिल्ला प्रशासनसँगको समन्वयमा उक्त निर्णय भएको जानकारी दिए ।

आयोजनाले नागढुंगा–पिपलामोड खण्ड निर्माणका लागि सडक बन्द गर्नुपरेको बताएको छ । नारायणगढ मुग्लिन सडक योजना (पूर्वी खण्ड) ले काठमाडौंबाट जाने सवारीसाधन नागढुंगामा र नौबिसेतर्फबाट काठमाडौं आउने सवारीसाधन खानीखोलामा रोकिने जनाएको छ ।

प्रहरीले विकल्पमा धार्के­–सितापाइला तथा टोखा­–छहरे­–त्रिशूली–गल्छी सडक प्रयोग गर्न अनुरोध गरेको छ ।