सामाजिक कथावस्तुमा आधारित म्युजिक भिडियो ‘परदेश’ सार्वजनिक

काठमाडौं । युवा मुक्तककार तथा वाचक हिमाल क्षेत्रीको भावनात्मक शब्दसँगै सुरु भएको उक्त म्युजिक भिडियो एभरेस्ट ग्यालरी टिमले निर्माण गरेको छ । यस म्युजिक भिडियोले समयसापेक्ष विषयवस्तुलाई समेट्दै हरेक नेपाली जनजन र बस्तीका कथालाई सजीव रूपमा प्रस्तुत गरेको छ ।

विशेष गरी विदेशी भूमिमा विभिन्न परिस्थितिका कारण बाध्य बनेकी एक नेपाली महिलाले भोग्नुपर्ने पीडा, संघर्ष र मानसिक अवस्थालाई भिडियोमा अत्यन्तै मार्मिक र हृदयविदारक ढंगले प्रस्तुत गरिएको छ। यसले वैदेशिक रोजगारीमा गएका नेपाली दिदीबहिनीहरूको यथार्थ जीवनलाई दर्शकसम्म पुर्याउन सफल भएको छ ।

म्युजिक भिडियोमा सनम कठायत र सृष्टि खड्काको बेजोड अभिनयले कथालाई अझ जीवन्त बनाएको छ । लोकप्रिय गायक सिडी विजय अधिकारी र शान्ति श्री परियारको सुमधुर युगल स्वरमा सजिएको यस गीतमा संगीत गायक स्वयं सिडी विजय अधिकारीकै रहेको छ भने शब्द रचना प्रजन बस्नेतले गरेका हुन् ।

मोडल सनम कठायतकै निर्देशनमा तयार भएको यो म्युजिक भिडियो केवल मनोरञ्जनमा सीमित नभई लाखौँ विदेशिएका नेपालीहरूको पीडा, आशा र आफ्नो जन्मभूमिप्रतिको गहिरो माया प्रस्तुत गर्ने एक सशक्त माध्यम बनेको छ ।

साथै, देशमै रोजगारी सिर्जना भई विदेशिएका नेपालीहरू स्वदेश फर्किने वातावरण बनोस् र सरकारले त्यसतर्फ ठोस पहल गरोस् भन्ने मूल सन्देश पनि यस भिडियोले दिन खोजेको छ ।

खिजिदेम्बा गाउँपालिकाको रमणीय बस्तीमा छायांकन गरिएको यस म्युजिक भिडियोमा दीपक गिरीको उत्कृष्ट छायांकन र अमृत चापागाइको कुशल सम्पादन रहेको छ । समग्रमा, ‘परदेश’ म्युजिक भिडियोले दर्शकको मन जित्दै सामाजिक सन्देशमूलक सिर्जनाका रूपमा उल्लेखनीय सफलता हासिल गरेको छ ।