काठमाडौं । नेपालको पुरानो र विश्वासिलो राइड सेयरिङ प्लेटफर्म ट्याक्सीमाण्डू र विश्वप्रसिद्ध अन्तर्राष्ट्रिय राइड सेयरिङ एप यांगोबीच ऐतिहासिक सहकार्य भएको छ । यस सहकार्यमार्फत यांगो एप अब नेपाली प्रयोगकर्ताले पनि सहज रूपमा उपयोग गर्न सक्ने भएका छन् ।
हाल ३० भन्दा बढी देशमा सञ्चालनमा रहेको यांगो अब ट्याक्सीमाण्डूको आधिकारिक साझेदार रूपमा नेपाल भित्रिएको छ । ट्याक्सीमाण्डूका प्रबन्ध निर्देशक अर्जुन केसीले भन्छन्, ‘अन्तर्राष्ट्रिय प्रविधिको अनुभव अब नेपाली यात्रु र चालकका लागि पनि उपलब्ध हुनेछ ।’
४० रुपैयाँबाट राइड, ३ प्रतिशत मात्र कमिशन मंगलबारदेखि सफ्ट लन्च गरिएको यांगो एपमार्फत बाइक राइड न्यूनतम ४० रुपैयाँ र ट्याक्सी राइड १८० रुपैयाँ बाट सुरु हुनेछ । सुरुका दिनमा चालक र यात्रु दुवैका लागि बोनस योजना पनि लागु गरिएको छ । त्यसैगरी, अबका तीन वर्षसम्म ३ प्रतिशतभन्दा बढी कमिशन नलिने घोषणा गरिएको छ, जसले चालकहरूको आम्दानीमा ठुलो सहयोग पुग्नेछ ।
यांगोले आफ्नै सवारी नभई स्थानीय चालक र ट्याक्सी व्यवसायीलाई समेत प्रविधिमार्फत यात्रुसँग जोड्ने छ । यांगोका प्रमुख व्यापार अधिकृत अदेनियी अदेबायो भन्छन्, ‘स्थानीय उद्यमीसँगको सहकार्यले आर्थिक अवसरहरू सिर्जना गर्नेछ र सहरको स्मार्ट मोबिलिटी पूर्वाधारमा योगदान पुग्नेछ ।’
डिजिटल लेखा प्रणाली, रियल टाइम ट्रयाकिङ र फ्लिट व्यवस्थापनजस्ता फिचरले पारदर्शिता र दक्षता दुवै बढाउने ट्याक्सीमाण्डुका प्रबन्ध निर्देशक केसीले बताए । यात्रु र चालक दुवैको सुरक्षा सुनिश्चित गर्न यांगो एपमा २० भन्दा बढी सुरक्षा फिचरहरू समावेश गरिएको छ । एपमार्फत यात्राको गन्तव्य अनुसार स्वचालित रूपमा अनुमानित भाडा देखिनेछ र हाललाई नगद भुक्तानीको व्यवस्था गरिएको छ । निकट भविष्यमा अनलाइन भुक्तानी प्रणाली पनि थपिनेछ ।
यांगो समूह : ग्लोबल टेक जायन्ट
यांगो एक विश्वव्यापी प्रविधि कम्पनी हो, जसले अफ्रिका, ल्याटिन अमेरिका, युरोप र दक्षिण एशिया लगायतका क्षेत्रमा राइड, डेलिभरी, फूडटेक तथा डिजिटल सेवा प्रदान गर्दै आएको छ । अब यही प्रविधि नेपाली प्रयोगकर्ताको हातमा आइपुगेको हो । ट्याक्सीमाण्डूका प्रबन्ध निर्देशक केसीका अनुसार अब ट्याक्सी चालक र बाइक राइडरहरूले घरमै बसेर क्यूआर कोड स्क्यान गरेर सहज रूपमा आफूलाई दर्ता गर्न सक्ने सुविधा सुरु गरिएको छ ।
यसो हुँदा चालकहरूलाई कार्यालय जानुपर्ने आवश्यकता हटाइएको छ, उनीहरुको समय र खर्च दुवै बचाउने उनले बताए । राइडर वा चालकले मोबाइलमा स्क्यान गरेर सीधै एपमार्फत आवश्यक विवरण भरेपछि केही मिनेटमै प्रोफाइल एक्टिभ हुने व्यवस्थामा यसमा मिलाइएको छ ।
केवल ३ प्रतिशत कमिशन, प्रत्येक ट्रिपमा बोनस पनि
हालका लागि ट्याक्सीमाण्डू–यांगोले केवल ३ प्रतिशत मात्रै कमिशन लिने भएको छ । यो कमिशन दर हाल नेपालमा उपलब्ध राइड सेयरिङहरुमै सबैभन्दा कम हो । साथै, प्रत्येक ट्रिपमा चालक र राइडरले बोनस पनि प्राप्त गर्ने व्यवस्था गरिएको छ, जसले चालकको आम्दानी र राइडरलाई सहुलियत दिनमा प्रत्यक्ष सहयोग पुग्नेछ । यांगो सेवाको सहज पहुँचका लागि हाल १० भन्दा बढी एजेन्सीहरूमार्फत् बजारमा सेवा उपलब्ध गराइएको छ ।
प्रतिक्रिया