काठमाडाैं । ‘फूलको आँखामा फूलै संसार’ बोलको चर्चित गीतकी गायिका आनी छोइङ डोल्मा बेलायतमा गुञ्जिने भएकी छन् । आउँदो ५ मेमा क्याम्बर्ली सरेस्थित लेकसाइड इन्टरनेसनल कन्ट्री पार्कको हलमा आनीको विशेष सांगीतिक प्रस्तुतिको तय भएको छ ।
‘इनर मेलोडि फर इनर पिस’ नाम दिइएको कार्यक्रम मानव सेवा आश्रम नेपालको भवन निर्माणको सहयोगार्थ गर्न लागिएको हो । पछिल्ला दिनमा गायनसँगै सामाजिक कार्यमा व्यस्त आनीले कार्यक्रममा आफ्ना चर्चित गीत पस्किने बताइएको छ । मानवताको संरक्षण र प्रवर्धनमा दशकदेखि गतिविधि गर्दै आएको मानव सेवा आश्रमले २०८२ सालसम्ममा सहयोगापेक्षि सडक आश्रित मानवमुक्त नेपाल बनाउने लक्ष्य लिएको छ । सोही लक्ष्य पूरा गर्न आयोजना गर्न लागिएको सांगीतिक कार्यक्रमबाट १ करोड ६८ लाख रुपैयाँ संकलन गर्ने लक्ष्य आयोजकको छ ।
सो कार्यक्रममा नेपाली दर्शकसँगै आध्यात्मिक तथा बौद्ध धर्ममा आस्था राख्ने बेलायत तथा युरोपका गरी १५ सय दर्शक सहभागी हुने आयोजकको अपेक्षा छ । कार्यक्रम विशुद्ध आध्यात्मिक हुने भन्दै मदिरा र मासु वर्जित गरिएको छ ।
सांगीतिक कार्यक्रमको मुख्य अतिथिमा बेलायतका लगि नेपाली राजदूत ज्ञानचन्द्र आचार्य रहनेछन् । कार्यक्रम सफल बनाउन संस्थाका संयोजक सुनीलबाबु खड्काको संयोजकत्वमा ३१ सदस्यीय मूल समितिसहित उपसमितिहरू बनाइएको छ ।
मानव सेवा आश्रमले सात वटै प्रदेशका १९ जिल्लामा २४ सेवा केन्द्र सञ्चालन गरिरहेको छ । हालसम्म १० हजारभन्दा बढी मानसिक र शारीरिकरूपमा अशक्त व्यक्तिलाई आश्रय दिनुका साथै परिवारबाट विच्छेद भएका ३ हजार १८० जनाको पुनर्मिलन गराइएको छ ।
प्रतिक्रिया