फतुवा बिजयपुरमा दादुरा–रुबेला खोप अभियान फागुन २० गते देखि सुरु हुने

रौतहट । बिजयपुर–रौतहट जिल्लाको फतुवा बिजयपुर नगरपालिकामा दादुरा–रुबेला खोप अभियान फागुन २० गतेदेखि सुरु हुने भएको छ । आज फतुवा बिजयपुर नगरपालिकाको स्वास्थ्य शाखाले आयोजना गरेको पालिकास्तरीय खोप समन्वय समिति अभिमूखीकरण कार्यक्रममा यस्तो जानकारी गराइएको हो ।

बिजयपुरस्थित शहिद मनरुप स्मृती भवनमा ११ वटै वडाका वडाध्यक्षहरु, विद्यालयका प्रधानाध्यापकहरु, स्वास्थ्य संस्थाका इन्चार्ज, सञ्चारकर्मी, युवा क्लबसँगको अभिमूखीकरण कार्यक्रममा जिल्ला स्वास्थ्य कार्यालय रौतहटका जनस्वास्थ्य अधिकृत हरेन्द्र गुुप्ताले दादुरा–रुबेला खोप अभियान सुरु गर्न लागिएको जानकारी गराए ।

फतुवा बिजयपुरका स्वास्थ्य संयोजक प्रमोद गुप्ताका अनुसार दोस्रो चरण अन्तर्गत फागुन २० गतेदेखि सुरु हुने उक्त अभियानअन्तर्गत १४ हजार ५ सय ८१ जना बालिबालिकालाई दादुरा–रुबेला खोप लगाउने लक्ष्य रहेको छ । सो अभियान नगरभरि फागुन २४ गते सम्म चल्ने छ ।

उनका अनुसार, दादुरा–रुबेला खोप अभियान अन्तर्गत नगरका स्वास्थ्य संस्था, शिक्षण संस्था लगायतका स्थानमा गरी ५८ खोप केन्द्र स्थापना गरिने छ । सो अभियान सफल पार्न २२ जना कर्मचारी परिचालन गरिने उनले बताए ।

शुक्रबार भएको अभिमूखीकरण कार्यक्रममा गुुप्ताले अभियानलाई सफल पार्न सबैजनाको भूमीका महत्वपूर्ण हुने भन्दै सहयोगका लागि आग्रह गरे । सो अवसरमा सबै वडाका वडाध्यक्ष, प्रधानाध्यापकहरु, स्वास्थ्य शाखाका कर्मचारी, सञ्चारकर्मी लगायतकाको पनि सहभागीता रहेको थियो ।