शतकको खडेरीमा कोहलीको नजर

दिल्ली । भारतीय क्रिकेट टोलीका कप्तान तथा वर्तमान समयका विश्व क्रिकेटका एक उत्कृष्ट ब्याट्सम्यान विराट कोहली झण्डै दुई वर्षदेखि शतक विहिन छन् । भारतले अहिले इंग्ल्यान्ड भ्रमणको तयारी गरिरहेको छ । आइसिसी विश्व टेस्ट च्याम्पियनसिप फाइनलमा अघिल्लो महिना न्युजिल्यान्डसँग ८ विकेटले पराजित हुँदै भारत ऐतिहासिक उपाधि जित्नबाट चुकेको थियो । कोहलीको कप्तानीमा भारतले हालसम्म आइसिसी ट्रफी जित्न सकेको छैन । भारत र इंग्ल्यान्डबीचको पाँच टेस्ट सिरिज अन्तर्गत पहिलो खेल बुधबारबाट नोटिङ्घममा सुरु हुँदैछ ।

इंग्ल्यान्डविरुद्ध सिरिजमा भारतीय कप्तान विराट कोहलीको सोच शतकको खडेरी तोड्ने हुनेछ । भारतलाई जितको लागि कोहलीको उत्कृष्ट प्रदर्शन निकै आवश्यक पनि देखिन्छ । कोहलीले टेस्टमा पछिल्लो पटक २०१९ नोभेम्बर २२ मा कोलकातामा बंगलादेशविरुद्ध १ सय ३६ रनको शतकीय इनिङ खेलेका थिए ।

त्यसपछि कोहलीले टेस्टमा शतक प्रहार गर्न सकेका छैनन् । अर्थात कोहली २० महिनायता देखि टेस्टमा शतक विहिन छन् । कोहलीलाई शतकमा खडेरीनै लागेको छ । कोहलीले ओडिआईमा शतक प्रहार नगरेको दुई वर्ष पुगिसकेको छ । पछिल्लो पटक कोहलीले २०१९ अगष्ट तेस्रो साता वेस्टइन्डिजविरुद्ध शतकीय इनिङ खेलेका थिए । त्यसयता कोहली ओडिआईमा शतक विहिन छन् । टि२० आई क्रिकेटमा कोहलीले हालसम्म शतक प्रहार गर्न सकेका छैनन् । इन्डियन प्रिमियर लिग (आइपिएल) मा रोयल च्यालेन्जर्स बेंगलोरका कप्तान कोहलीले पछिल्लो पटक २०१९ मा कोलकता नाइट राइडर्सविरुद्ध शतक प्रहार गरेका थिए ।

टेस्टमा पछिल्लो समय कोहलीको प्रर्दशन त्यति राम्रो पनि छैन । पछिल्ला पाँच टेस्ट खेलमा दुई इनिङमा शून्यमा आउट भएका छन् । उनको पछिल्लो पाँच टेस्ट खेलको प्रदर्शन क्रमशः १३, ४४, ०, २७, ०,६२, ७२ र ११ छ । २०१९ मा बंगलादेशविरुद्ध उक्त शतकपछि कोहलीले ८ टेस्ट खेल खेलेका छन् । जसमा उत्कृष्ट प्रदर्शन गत डिसेम्बरमा अष्ट्रेलियाविरुद्ध ७४ रन छ । कोहलीले टि२० आईमा भने हालसम्म शतक प्रहार गर्न सकेका छैनन् ।

कोहलीलाई इंग्ल्यान्डविरुद्ध जेम्स एन्डरसन र स्टुअर्ट ब्रोड जस्ता विश्वस्तरिय बलरसामू शतकको लागि सहज भने देखिदैन । इंग्ल्यान्ड घरेलु मैदानमा उत्कृष्ट प्रदर्शनका साथ आइसिसी विश्व टेस्ट च्याम्पियनसिप २०२१÷२३ मा सानदार सुरुवात गर्न चाहन्छ ।

प्रतिक्रिया