सिल्भा सिटीबाट बाहिरिने

एजेन्सी, सिटी । डेविड सिल्भाले म्यानचेस्टर सिटीबाट बाहिरिने निर्णय गरेका छन् । एक अन्तर्वार्तामा सिल्भाले २०१९–२० को सिजन पछि म्यानचेस्टर सिटी छोड्ने बताए । ३३ वर्षे सिल्भाले म्यानचेस्टर सिटीलाई चारवटा प्रिमियर लिग उपाधि जिताउन महत्वपूर्ण भूमिका खेलेका थिए ।

सन् २०१० मा सिटीमा आबद्ध भएका सिल्भाले ३९५ खेल खेल्दै क्लबलाई चार पटक लिग कप र दुई पटक एफए कपको उपाधि पनि जिताएका थिए । गएको सिजन पनि उनले ३३ खेलमा ६ गोल गरेका थिए । यो सिजनपछि क्लबमा रहने वा नरहने भन्ने जिज्ञासामा उनले यो अन्तिम सिजन हुने प्रतिक्रिया दिए ।

‘१० वर्ष मेरो लागि पर्याप्त हो । क्लब छोड्ने यो नै उपयुक्त समय हो’, सिल्भाले थपे । सिटीले सिल्भाको दुई वर्ष सम्झौता बढाउन चाहन्थ्यो । तर, उनले एक वर्षे सम्झौता पत्रमा हस्ताक्षर गरेको बुझिएको छ ।