पूर्ण खोपमुक्त गाउँ घोषित

सुनसरी । सुनसरी जिल्लाको साविक मधेली गाउँ अर्थात् गडी गाउँपालिकामा गाभिएको उक्त गाउँलाई हालै पूर्ण खोपमुक्त गाउँ घोषित गरिएको छ । सुनसरीका सबै गाउँ तथा नगर र उपमहानगरलाई पूर्ण खोपमुक्त घोषणा गर्ने क्रममा शुक्रबार मधेली पूर्ण खोपमुक्त १६ औँ गाउँका रूपमा घोषित भएको हो । केही दिनअघि सुनसरीको श्रीपुर गाउँअर्थात कोसी गाउँपालिकालाई १५ आँै पूर्ण खोपमुक्त गाउँ घोषित गरिएको थियो । स्थानीय विकास अधिकारी तुलसीप्रसाद श्रेष्ठले उक्त गाउँलाई पूर्ण खोपयुक्त घोषणा गर्दै अन्य गाउँ तथा सहर पनि निकट समयभित्रमा नै पूर्ण खोपमुक्त बन्ने अन्तिम तयारीमा पुगिसकेको बताए ।
त्यसैगरी युचेप नेपाल र रेस्टलेस डेभलेपमेन्ट नेपालको आयोजनामा सुनसरी जिल्लाका सबै गाउँ तथा नगर र बस्तीमा हुने बाल विवाह तथा घरेलु हिंसाका घटनालाई न्यूनीकरणका लागि सञ्चालित अभियानअन्तर्गत शुक्रबार मनदेखि मन जोड्ने यात्रा सांगीतिक अभियानको शुभारम्भ गरिएको छ । जिल्लाको सदरमुकाम इनरुवा नगरपालिका क्षेत्रमा रहेको बबियाको सरस्वती जनता मावि मधेसाका सात सय ५० विद्यार्थीलाई सहभागी गराएर मनदेखि मन जोड्ने सांगीतिक अभियानको जनचेतना विस्तार गर्ने सांगीतिक कार्यक्रम मञ्चन गरिएको थियो ।
सांगीतिक कार्यक्रममा सहभागी भएका विद्यार्थी कलाकारले बाल विवाह हुँदाको अवस्था पीडा र त्यसले बालबालिकामा पार्ने सकारात्मक एवं नकारात्मक असर अनि त्यसले समाजमा ल्याउने विकृतिलगायत विषयमा प्रयोगात्मक रूपमा प्रदर्शित कार्यक्रमले सबैको मन छुने सन्देश दिने कार्य भएको थियो । युचेप नेपालका रविन घिमिरे रेस्टलेस डेभलपमेन्ट नेपालकी बिनिता श्रेष्ठ लक्ष्मी परियार अनुजा पोख्रेल विवेक चापागाईं अमृता उराव उमेश कार्की रविना चौधरी सुजता अधिकारीलगायतको नेतृत्वमा उक्त कार्यक्रम सञ्चालन गरिँदै आएको छ ।
कार्यक्रमले जिल्लाका सबै गाउँ सहर क्षेत्रमा बाल विवाह घरेलु हिंसालगायत विषयमा प्रचलनमा रहेका विकृतमूलक विसंगतिलाई कसरी अन्त्य गर्ने भन्ने विषयमा सशक्त सन्देश प्रवाह गर्ने अभियानको लक्ष्य रहेको रविन घिमिरेले जानकारी दिए ।