कुलिङ पिरियडमा मेरो गल्ती देखियो भने जस्तोसुकै सजाय भोग्न तयार छु : रामहरि खतिवडा

काठमाडौं । प्रतिनिधिसभा अन्तर्गतको राज्य व्यवस्था तथा सुशासन समितिका सभापति रामहरि खतिवडाले निजामती विधेयकको कुलिङ पिरियडमा भएको गडबडीमा आफ्नो गल्ती देखिएमा जस्तोसुकै सजाय भोग्न पनि तयार भएको बताएका छन् । बुधबार समितिको बैठकमा सांसदहरूले उठाएका विषयको जवाफ दिने क्रममा उनले यस्तो बताएका हुन् ।

‘यो गम्भीर अपराध हो, अक्षम्य अपराध हो, सभामुखलाई छानबिनका लागि अनुरोध गर्न चाहन्छु’, सभापति खतिवडाले भने, ‘गल्ती देखियो भने रामहरि खतिवडा जस्तोसुकै सजाय भागी बन्न तयार छु ।’ साथै, उनले निजामती विधेयकको कुनै पनि इस्यूमा समितिको कार्यअधिकार भन्दा बाहेकमा रहेर कहिल्यै पनि कुनै शब्द नथपेको बताए ।

‘कुनै पनि इस्यूमा समितिको कार्यभन्दा बाहेक मैले थपेको भनेको ‘राजीनामा दिएपछि’ र ‘अन्य सरकारी’ भन्दा बाहेक केही थिएन,’ उनले भने । उनले आफ्नो राजनीतिलाई नै सक्ने गरी समितिका काममाथि प्रश्न उठाउने काम भएको बताए ।

‘राजनीतिमा कसैको निगाहबाट आएको होइन, मेरो बाउ शहीद भएर पनि आएको होइन चन्दा दिएर पनि आएको होइन’ खतिवडाले भने, ‘राजनीतिमा दुस्ख गरेर आएको हुँ, निष्ठा र प्रतिष्ठसँग म आज पनि दृढ छु । ममाथि आक्रमण प्रहार भएको छ ।’

उनले आफू मात्रै नभई संसदमाथिकै प्रहार भएको पनि बताए । साथै सभापति खतिवडाले आफ्नो समितिले विभिन्न ठूला उपलब्धि गरेको भए पनि यसपटकको यो विषयलाई लिएर खुइल्याउने काम हुन थालेको पनि बताए ।

‘कतिपय निजामती कर्मचारीको काम र प्रतिष्ठा हेरेर हामीलाई गर्व लाग्छ । कतिपय कर्मचारी आफू मात्रै खाऔं भन्ने खालको पनि हुनुहन्छ । त्यसलाई कन्ट्रोल गर्नका लागि पनि हामीले कुलिङ पिरियड ल्यायौं,’ खतिवडाले भने ।

यही प्रकरणमा नेकपा एमाले, माओवादी केन्द्र र एकीकृत समाजवादीका सांसदले राज्यव्यवस्था तथा सुशासन समितिका सभापति खतिवडाको राजीनामा मागेका छन् । आज बसेको राज्यव्यवस्था तथा सुशासन समितिको बैठकमा सांसदहरुले सभापति खतिवडाले नैतिकताका आधारमा राजीनामा दिनुपर्ने माग गरेका हुन् ।