बन्द उद्योग खोल्न दबाब दिऔँ : दाहाल

काठमाडौं, १९ वैशाख । एमाओवादी अध्यक्ष पुष्पकमल दाहालले बन्द भएका सरकारी उद्योगधन्दा एवं प्रतिष्ठानलाई पुनःसञ्चालनमा लागि दबाब दिन मजदुरलाई आग्रह गरेका छन् ।

अन्तर्राष्ट्रिय मजदुर दिवसका अवसरमा अखिल नेपाल टे«ड युनियन महासंघले आइतबार आयोजना गरेको जनसभालाई सम्बोधन गर्दै उनले उद्योगधन्दा बन्द गराउने र मुलुकलाई परनिर्भर बनाउने प्रवृत्तिलाई रोक्न पनि संघर्षको जरुरी रहेको बताए । विगतमा स्थापना भएका उद्योगधन्दा बन्द गरेर मुलुकलाई कंगाल र आर्थिक रूपमा परनिर्भर बनाइएको उल्लेख गर्दै अध्यक्ष दाहालले भने, ‘संविधानमा प्राप्त भएको अधिकारलाई संस्थागत गर्दै मजदुर वर्ग अगाडि बढ्नुपर्छ । त्यसका लागि श्रमजीवी वर्गको साथ र सहयोग जरुरी छ । त्यसका अलावा अब नयाँ खालको संघर्ष पनि आवश्यक छ ।’

उनले मजदुरको रोजीरोटीसमेत धान्न नसक्ने ज्याला र श्रम समस्याको समाधान, सामाजिक सुरक्षा तथा अन्य अधिकारको विषयमा प्रष्ट एजेन्डाका साथ अगाडि बढ्नुपर्नेमा जोड दिए । हेटाँैडा कपडा उद्योग, छाला जुत्ता कारखाना, जनकपुर चुरोट उद्योगलगायत ठूला र महत्वपूर्ण उद्योग व्यवसाय बन्द गरिएको, बन्द नभएका उद्योगसमेत विगतमा निजीकरण गरिएका कारण मुलुकभित्र रोजगारीको अवसर गुमेको भन्दै उनले आन्दोलनको बलमा ती उद्योग पुनःस्थापना गर्नुपर्ने बताए ।

उद्योगधन्दा लावारिस बनाउने, निजीकरण गर्ने प्रवृत्तिविरुद्ध स्थानीय तहदेखि केन्द्रसम्म सशक्त संघर्ष गर्नुपर्ने र त्यसका लागि योजनाबद्ध प्रयासको समेत जरुरी रहेको अध्यक्ष दाहालको कथन थियो । रोजगारीको खोजीमा विश्वका विभिन्न मुलुकमा पुगेका नेपाली श्रमिक तथा मजदुरको आत्मसम्मान नभएको, अनेकौँ हैरानी खेप्नु परेको भन्दै उनले त्यस्ता लज्जाको विषय हटाउन र मुलुकभित्रै रोजगारी दिनुपर्ने उल्लेख गरे ।

भूकम्पपछिको पुनर्निर्माणका लागि राष्ट्रिय एकता र सहमतिको जरुरी रहेको र सबै पक्ष मिलेर जानुको विकल्प नभएको तथा राष्ट्रिय सहमति अत्यावश्यक रहेको स्पष्ट पारे । मधेसी, आदिवासी, जनजातिलगायतका समुदायले संविधानमा सकारात्मक संशोधन होओस् भन्ने अपेक्षा राखेको भन्दै उनले त्यसका लागि नेतृत्व गर्न आफ्नो पार्टी तयार रहेको र राष्ट्रिय एकतासमेत आवश्यक रहेको बताए । कार्यक्रममा एमाओवादीका उपाध्यक्ष नारायणकाजी श्रेष्ठ र अखिल नेपाल टे«ड युनियन महासंघका अध्यक्ष शालिकराम जमरकट्टेलले समाजवादउन्मुख संविधानलाई कार्यान्वयन गर्न मजदुर वर्गको सकारात्मक सहयोगको जरुरी रहेको उल्लेख गरे । यसअघि शान्तिबाटिकाबाट निकालिएको पदयात्रा सहिदगेट, सुन्धारा, रत्नपार्क हुँदै शान्तिकाबाटिकामा पुगेर अन्त्य भएको थियो ।