खोजखबर

बाटोले बनायो सुकुम्बासी

सौर्य अनलाइन २०६९ वैशाख २५ गते २:११ मा प्रकाशित

बाग्लुङ, २५ वैशाख । गाउँमा बाटो आउँदा सबै खुसी हुन्छन् तर २० वर्षअघि गाउँमा बाटो आउँदा सुकुम्बासी भएका बाग्लुङ–१ गणेशथानका १४ माझी परिवारको जीवन कष्टकर बनेको छ ।

२०४८ सालमा पोखरा–बाग्लुङ राजमार्ग निर्माण क्रममा जग्गाको लालपुर्जामा उल्लेख गरिएको जग्गा बाटाले पुरेपछि विस्थापित भएका हुन् । २१ वर्ष पहिले विस्थापित उनीहरु बाग्लुङ बाङ्गेचौरस्थित रामरेखा सामुदायिक वन उपभोक्ता समूहको खेल मैदाननजिकै टहरामा बस्दै आएका छन् ।
कालीगण्डकी नदीमा पुल नहुँदा मान्छे वारपार गराउने, माछा मार्ने र नदीमा सुन चालेर जीविकोपार्जन गर्ने माझी घरजग्गा पुरिएपछि पुख्र्यौली पेसाबाट समेत वञ्चित छन् । ‘सरकारले पटकपटक जग्गा उपलब्ध गराउने आश्वासन दिए पनि अहिलेसम्म पाएनौँ,’ विस्थापित कर्ण माझीले भने, दैनिक जीवनयापन गर्न पनि समस्या परेको छ ।’
६५ सदस्य रहेका माझी समुदायलाई पुन:स्थापनाका लागि २०६१ सालमा सिडिओ अध्यक्ष र नगरपालिकाका प्रमुख सचिव रहने गरी बस्ती व्यवस्थापन समिति गठन गरिएको थियो । समितिले लागत इस्टिमेट गरेर ०६२ मा तत्कालीन सिडिओ प्रेमनारायण शर्माले शिलान्यास समेत गरेका थिए । माझी बस्ती व्यवस्थापनका लागि जिल्ला परिषद्बाट १० लाख रुपियाँ पनि विनियोजन भएको छ । लोपोन्मुख माझीको संरक्षणका लागि जग्गा दिएर बस्ती बसाउने तयारी भइरहेको नगरपालिकाका कार्यकारी अधिकृत यदुनाथ पौडेलले बताए । ‘व्यक्तिको निजी जग्गा किनेर बस्ती व्यवस्थित गर्न पहल भइरहेको छ,’ पौडेलले भने, ‘यो आर्थिक वर्षमा जग्गा खरिद गर्नेछौं, त्यसपछि प्रतिपरिवार तीन आनाको दरले जग्गा प्लटिङ गरेर वितरण गरिनेछ ।’

प्रतिक्रिया

पछिल्ला अपडेट्स

लोकप्रिय