खोटाङ । पढेलेखेका व्यक्तिले ‘जागिर नै खानुपर्छ’ भन्ने ठान्ने नेपाली समाजमा स्नातकोत्तर (डिग्री) पास गरेको व्यक्तिले गोठाले जीवन बिताइरहेको सुन्दा अनौठो लाग्ने नै भयो । कतिपयले त पढेको मान्छेले यस्तो काम पनि गर्छन् भनेर हेयको दृष्टिले पनि हेर्छन् । तर, केपिलासगढी गाउँपालिका–१ तेराहाका लक्ष्मण साम्पाङ ‘समीप’ लाई त्यसको पर्वाह छैन । उनी ५०० भन्दा बढी भेडाको बथानमै रमाइरहेका छन् ।
राजनीतिशास्त्रमा स्नातकोत्तर तह उत्तीर्ण साम्पाङले विगत ५ वर्षदेखि मुन्धुम भेडापालन फार्म दर्ता गरेर व्यावसायिक भेडापालनमा रमाइरहेका हुन् । हाल उनको फार्ममा ५०० जति उन्नत (बडुवाल) जातका भेडासँगै आफ्नो सुन्दर सपना सजिइरहेको छ ।
दुःखजिलो गरेर स्नातकोत्तर पढाएको छोरा सरकारी जागिरे होस् भन्ने बुबाआमाको चाहनाविपरीत आफू भेडापालन व्यवसायमा लागेको साम्पाङले बताए । ‘म सानैदेखि स्वतन्त्रतामा रमाउने मान्छे । सरकारी वा अन्य जागिरमा त्यस्तो हुँदैन । राजनीतिशास्त्र पढेको मान्छे राजनीतिमा रुची हुने नै भयो । तर, त्यसका लागि आर्थिक अवस्था राम्रो हुनुपर्यो नि ! त्यसैले यो व्यवसाय रोजेको हुँ,’ उनले भने ।
दिक्तेलस्थित सालपा विकास बैंकबाट ऋण लिएर २० लाख रुपैयाँमा उन्नत जातका १८० वटा भेडा खरिद गरी व्यवसाय सुरु गरेका उनले हाल वार्षिक करिब २० लाख रुपैयाँ आम्दानी हुने गरेको सुनाए । २०५८ सालदेखि राजनीतिमा समेत सक्रिय ३९ वर्षीय साम्पाङले नेकपा (माओवादी केन्द्र) को राजनीति पनि सँगसँगै अगाडि बढाएको बताए । उनले पार्टीको भ्रातृ संगठन अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी)को जिल्ला तहदेखि केन्द्रीय सदस्यसम्मको भूमिका निर्वाह गरिसकेका छन् । हाल पार्टीको केपिलासगढी गाउँपालिका कार्यसमिति सचिवसमेत हुन् ।
युवा पुस्तालाई ‘राजनीतिलाई पेसा हैन, सेवा गर्ने माध्यम बनाउनुपर्छ’ भन्ने सन्देश दिन भेडापालन व्यवसाय सुरु गरेको बताउने सम्पाङलाई आफ्नै सहोदर अन्तरे भाइ भैराज साम्पाङले सहयोग गर्दै आएका छन् । यसका साथै उनले स्थानीय २ जनालाई पनि आफ्नो व्यवसायमा जोडेका छन् । ‘म, भाइ र स्थानीय पृथ्वीराज राई र कल्याण राई पछिल्लो समय यही व्यवसायमा रमाइरहेका छौँ । चारै जनाले पालैपालो लेकबेँसी, भेडीचोकमा बसेर भेडाको हेरचाह गरिरहेका छौँ,’ साम्पाङले भने, ‘हिउँदको समयमा बेँसी क्षेत्रको रावा फाँट तथा स्थानीय बासिन्दाको खेतबारी र बर्खाको समयमा लेकाली क्षेत्र मयुङलगायत फाँटहरूमा चरनका लागि पुर्याउने गरेका छौँ ।’
चारै जना भेडा फार्ममा हुर्किरहेका भेडाका थुम्बा (साँढ) र पाठापाठीसँगै पर्यटकीय स्थल मयुङ (झन्डै ३ हजार रोपनी क्षेत्रफलमा फैलिएको) को घाँसे मैदानमा रमाइरहेका भेटिन्छन् । जिल्लाको केपिलासगढी गाउँपालिका–१ फेदी, भोजपुरको टेम्केमैयुङ गाउँपालिका–१ तिम्मा र भोजपुरको साल्पासिलिछो गाउँपालिका–५ दोभानेको सिमानामा पर्ने पर्यटकीय स्थल मयुङको मनोरम दृश्यले त्यहाँ पुग्ने जोकोहीको मन लोभ्याउने गर्छ । बाह्रै महिना ढकमक्क फुलिरहने विभिन्न प्रजातिका फूल, समथर घाँसे मैदान, प्रयाप्त पानीको स्रोत, जडीबुटी तथा विभिन्न ठाउँको दृश्य देखिने यस ठाउँमा भेडाको बथानले माहोल थप हेर्नलायक हुन्छ । पर्यटकीय स्थल मयुङ समुद्री सतहदेखि ३ हजार ३३३ मिटर उचाइमा पर्छ ।
साम्पाङले भेडाको साँढ, पाठापाठी, मासु, ऊन र घ्यू बिक्रीबाट आम्दानी हुने गरेको बताए । यहाँ भेडाको साँढ ५० हजार, मासु प्रतिकेजी ८००, ऊन प्रतिकेजी ५०० सम्म र घिउ प्रतिकुरुवा ४ हजार रुपैयाँसम्ममा बिक्री हुने गरेको उनले सुनाए । –रासस
प्रतिक्रिया