काठ, दाउरा बिक्रीबाट तीन करोड संकलन

बारा १८ फागुन। जिल्ला वन कार्यालय बाराले चालु आर्थिक वर्षको पुस मसान्तसम्ममा काठ तथा दाउरा बिक्रीबाट दुई करोड ९६ लाख ७८ हजार आठ सय ३८ रुपैयाँ संकलन गरेको छ ।  आव ०७३÷७४ मा ४६ हजार नौ सय ८८ दशमलव ८४ घनफिट काठ बिक्रीबाट दुई करोड ९६ लाख ७४ हजार आठ सय ३८ र एक चट्टा दाउरा बिक्रीबाट चार हजार गरी दुई करोड ९६ लाख ७८ हजार आठ सय ३८ रुपैयाँ संकलन गरेको वन संरक्षण तथा सदुपयोग शाखाका प्रमुख सहायक वन अधिकृत श्यामनन्दन सिंहले बताए ।  वन कार्यालय बाराले चालु आवको पुस महिनासम्म चार हजार सात सय ४९ दशमलव २९ घनफिट र सात दशमलव २५ दाउरा संकलन गरेको छ ।
गत आवमा जिल्ला वन कार्यालयले ७३ हजार ६ सय ४९ दशमलव ०२ घन फिट काठ बिक्रीबाट सात करोड ७० लाख ६९ हजार पाँच सय २३ रुपैयाँ राजस्व र ४६ दशमलव पाँच दाउरा बिक्रीबाट सात लाख नौ हजार पाँच सय नौ रुपैयाँ संकलन गरेको कार्यालय स्रोतले जनाएको छ ।  बारामा वन पैदावारमा आधारित उद्योगहरूमा स.मिल र भेनियर उद्योग ७७, इँटा टायल उद्योग ९८, कत्था उद्योग तीन, कोइला उद्योग एक, फर्निचर उद्योग ८०, ढुंगा क्रसर उद्योग २८ र जडिबुटी प्रशोधन प्लान्ट उद्योग तीन गरी दुई सय ८० वटा उद्योगहरू सञ्चालनमा रहेका छन् ।