पेरिस । विश्वकप फुटबलको समूह चरणबाटै दक्षिण कोरिया बाहिरिएपछि देशभर तीव्र असन्तुष्टि फैलिएको छ । टोलीका मुख्य प्रशिक्षक होङ म्युङ–बोले पदबाट राजीनामा दिए पनि राष्ट्रिय फुटबल प्रशासनमा व्यापक सुधार हुनुपर्ने माग भने अझै चर्किंदै गएको छ । राष्ट्रपति, पूर्वराष्ट्रिय खेलाडी तथा समर्थकहरूले दक्षिण कोरियाली फुटबलको नेतृत्व तहमा आमूल परिवर्तन आवश्यक रहेको बताएका छन् । सन् २००२ मा आफ्नै भूमिमा आयोजित विश्वकपमा सेमिफाइनलसम्म पुगेको दक्षिण कोरिया यसपटक भने पहिलो चरणमै बाहिरिन बाध्य भयो । नकआउट चरणमा पुग्ने सम्भावना बलियो रहे पनि अन्तिम समूह खेलमा आफूभन्दा कमजोर मानिएको दक्षिण अफ्रिकासँग १–० गोल अन्तरले पराजित भएपछि टोलीको यात्रा समाप्त भएको थियो । उत्कृष्ट तेस्रो स्थानमा रहने ८ टोलीभित्र पर्न नसक्दा दक्षिण कोरिया प्रतियोगिताबाट बाहिरिएको हो ।
निराशाजनक प्रदर्शनपछि प्रशिक्षक होङ म्युङ–बोले आइतबार आफ्नो पदबाट राजीनामा दिएका छन् । यस्तै, टोलीका कप्तान तथा स्टार फरवार्ड सन ह्युङ–मिनको अन्तर्राष्ट्रिय फुटबल भविष्यबारे पनि अन्योल बढेको छ । उनले यसअघि नै राष्ट्रिय टोलीबाट सन्न्यास लिन सक्ने संकेत दिएका थिए । दक्षिण कोरियाका राष्ट्रपति ली जाए म्युङले टोलीको प्रदर्शनप्रति असन्तुष्टि व्यक्त गर्दै ‘अयोग्य नेतृत्व’ लाई यसको मुख्य कारण ठहर गरेका छन् । उनले देशवासीसँग माफी माग्दै फुटबल प्रशासनमा देखिएका कमजोरी सुधार गर्नुपर्ने आवश्यकता औँल्याएका छन् । राष्ट्रपतिको अभिव्यक्तिले लामो समयदेखि फुटबल संघप्रति जनतामा बढ्दै आएको असन्तुष्टिलाई थप बल दिएको विश्लेषण गरिएको छ ।
पूर्वकप्तान पार्क जी–सुङले पनि यो परिणाम अप्रत्याशित नभएको बताएका छन् । उनका अनुसार दक्षिण कोरियाली फुटबलले विगतमा सिकेका महत्वपूर्ण पाठहरू बिर्सिएको छ । विश्वकपका लागि टोली निर्माण, तयारी तथा युवा खेलाडीको विकासमा एक दशकसम्म गरिएको मिहिनेतलाई निरन्तरता दिन नसक्दा अहिलेको अवस्था सिर्जना भएको उनले बताएका छन् । समूह ‘ए’ मा आयोजक मेक्सिको, दक्षिण अफ्रिका र चेकियासँग रहेको दक्षिण कोरियाले पहिलो खेलमा चेकियालाई २–१ ले पराजित गरेको थियो । तर त्यसपछि मेक्सिकोसँग १–० ले पराजित भयो भने अन्तिम खेलमा दक्षिण अफ्रिकासँग हार बेहोरेपछि प्रतियोगिताबाट बाहिरियो ।
टोली स्वदेश फर्कने तयारीमा रहे पनि स्थानीय सञ्चारमाध्यमका अनुसार कोरिया फुटबल संघ (केएफए) ले यसपटक स्वागत कार्यक्रम आयोजना नगर्ने निर्णय गरेको छ । यसअघि सन् २०१४ को विश्वकपपछि पनि समूह चरणबाट बाहिरिएको टोली स्वदेश फर्कंदा समर्थकहरूले उनीहरूमाथि कोरियाली परम्परागत मिठाइ फ्याँकेर आक्रोश व्यक्त गरेका थिए । त्यतिबेला पनि प्रशिक्षकको जिम्मेवारी होङ म्युङ–बोकै काँधमा थियो । सन् २०२४ को जुलाईमा पुनः राष्ट्रिय टोलीको जिम्मेवारी सम्हालेका होङ म्युङ–बो सुरुदेखि नै आलोचनाको केन्द्रमा थिए । जर्मनीलाई खेलाडीको रूपमा विश्वकप जिताएका पूर्वप्रशिक्षक युर्गेन क्लिन्समानलाई बर्खास्त गरेपछि होङलाई पुनर्नियुक्त गरिएको थियो ।
तर उनको नियुक्ति प्रक्रिया पारदर्शी र निष्पक्ष नभएको भन्दै कोरिया फुटबल संघको व्यापक आलोचना भएको थियो । विश्वकपका क्रममा पनि होङले निर्णायक खेलमा स्टार खेलाडी सन ह्युङ–मिनलाई सुरुआती टोलीमा नराख्ने निर्णय गरेपछि समर्थकहरू थप असन्तुष्ट बने । दक्षिण अफ्रिकाविरुद्ध बराबरी मात्रै पर्याप्त हुने अवस्थामा टोली पराजित भएपछि उनको रणनीतिमाथि गम्भीर प्रश्न उठाइएको थियो । खेलपछि उनले टोलीको असफलताको कारण आफैँले पनि स्पष्ट रूपमा बुझ्न नसकेको प्रतिक्रिया दिएका थिए ।
सन् २००२ को ऐतिहासिक विश्वकप टोलीका सदस्य ली चुन–सुले दक्षिण कोरिया अर्को टोलीको नतिजाको भर पर्नुपर्ने अवस्थासम्म पुगेको भन्दै निराशा व्यक्त गरेका छन् । उनले यो परिणाम सम्पूर्ण फुटबल प्रशासन परिवर्तन गर्नुपर्ने स्पष्ट सन्देश भएको बताएका छन् । उनका अनुसार अहिलेको अवस्थाको जिम्मेवारी सम्बन्धित सबै पदाधिकारीले लिनुपर्छ । विशेषगरी कोरिया फुटबल संघका अध्यक्ष चुङ मङ–ग्यु समर्थकहरूको मुख्य निशानामा परेका छन् । उनी विश्वकपपछि पद छाड्ने घोषणा गरिसकेका छन् । लगातार १३ वर्ष नेतृत्व सम्हालेका चुङले आफ्नो कार्यकालमा पर्याप्त सफलता हासिल गर्न नसकेको स्वीकार गरेका छन् ।
उनी यसअघि खेल मिलेमतोमा दोषी ठहर भई आजीवन प्रतिबन्धमा परेका केही पूर्वखेलाडीलाई माफी दिन खोजेको विषयमा पनि विवादमा तानिएका थिए । अब प्रशिक्षक होङ म्युङ–बो र अध्यक्ष चुङ मङ–ग्यु मात्र होइन, कप्तान सन ह्युङ–मिनको भविष्य पनि चासोको विषय बनेको छ । आगामी महिना ३४ वर्ष पुग्ने सनले राष्ट्रिय टोलीबाट सन्न्यास लिने वा नलिनेबारे अझै कुनै औपचारिक निर्णय सार्वजनिक गरेका छैनन् । पूर्वकप्तान पार्क जी–सुङले दक्षिण कोरियाली फुटबलले विगतका कमजोरीबाट शिक्षा लिएर दीर्घकालीन सुधारको बाटो रोज्नुपर्ने बताएका छन् । उनका अनुसार एउटै गल्ती बारम्बार दोहोरिने चक्र अन्त्य गर्दै भविष्यका लागि बलियो योजना बनाउनु नै अहिलेको सबैभन्दा ठुलो आवश्यकता हो ।
प्रतिक्रिया