विद्युतीय गाडीमा सूचना चुहावट गरेको पुष्टि गर्नुस्, सार्वजनिक जीवन नै त्यागिदिन्छु : अर्थमन्त्री वाग्ले

काठमाडौं । अर्थमन्त्री डा स्वर्णिम वाग्लेले विद्युतीय सवारीसाधनसम्बन्धी कर निर्धारणमा सूचना चुहावट गरेको पुष्टि गर्न चुनौती दिएका छन् ।

सार्वजनिक लेखा समितिको आजको बैठकमा उनले आफूविरुद्ध नियोजित रूपमा भ्रम फैलाउने र बदनाम गर्ने प्रयास भइरहेको बताए ।

‘दुई अर्ब होइन, दुई रुपैयाँ मात्र बेइमानी गरेको प्रमाण दिनुस्, म अर्थमन्त्री र राजनीति मात्र होइन, सार्वजनिक जीवन नै त्यागिदिन्छु,’ अर्थमन्त्री डा वाग्लेले भने, ‘यस्तो नैतिक प्रतिबद्धता अरू राजनीतिकर्मीमा पनि छ ?’, ।