अमेरिकी राष्ट्रपति ट्रम्प सहभागी कार्यक्रममा गोली चल्याे, एक जना पक्राउ

वासिङ्टन । अमेरिकी राष्ट्रपति डोनाल्ड ट्रम्प सहभागी रहेको डिनर कार्यक्रममा एक हतियारधारी व्यक्तिले आक्रमण गर्ने प्रयास गर्दा ठूलो सुरक्षा घटना भएको छ । प्रारम्भिक जानकारी अनुसार ती व्यक्तिले बन्दुक र चक्कु लिएर कार्यक्रम स्थलको लबी क्षेत्रमा प्रवेश गर्ने प्रयास गरेका थिए । त्यसपछि सुरक्षाकर्मीहरू तत्काल सक्रिय भएका थिए भने उनलाई नियन्त्रणमा लिएका थिए ।

घटनाको क्रममा गोली चलेको आवाज सुनिएको थियो भने केही अतिथिहरू डराएर टेबलमुनि लुकेका थिए । राष्ट्रपति ट्रम्पलाई सुरक्षाकर्मीहरूले तुरुन्तै सुरक्षित स्थानमा लगेका थिए । उनी सकुशल रहेको बताइएको छ ।

सुरक्षा अधिकारीहरूसँग भएको मुठभेडमा आक्रमणकारीले गोली हानेको र सुरक्षाकर्मीहरूले पनि जवाफी कारबाही गरेको बताइएको छ । एक सुरक्षा अधिकारीलाई गोली लागेको भए पनि बुलेटप्रुफ ज्याकेटका कारण गम्भीर क्षति हुनबाट जोगिएको छ । आक्रमणकारीलाई घटनास्थलमै नियन्त्रणमा लिइएको छ भने उनी एक्लै योजना बनाएर आएको प्रारम्भिक निष्कर्ष छ ।

अमेरिकी सरकारी वकिलका अनुसार उक्त संदिग्ध व्यक्तिविरुद्ध हिंसात्मक अपराधका क्रममा हतियार प्रयोग गरेको र संघीय सुरक्षाकर्मीमाथि खतरनाक हतियार प्रयोग गरी आक्रमण गरेको आरोप लगाइने छ । उनलाई सोमबार राजधानीस्थित संघीय अदालतमा पेश गरिने छ ।

समाचार स्रोतका अनुसार घटना अचानक भएको भए पनि सुरक्षाकर्मीहरूको तत्काल प्रतिक्रियाका कारण ठूलो दुर्घटना हुनबाट जोगिएको छ । अहिले घटनाबारे विस्तृत अनुसन्धान जारी छ र सुरक्षालाई अझ कडा बनाइएको छ ।