इरानले आक्रमण गर्यो भने उसले अमेरिकी सेनाको जवाफी कारवाही भोग्नुपर्ने ट्रम्पको धम्की

वासिङ्टन । अमेरिकी राष्ट्रपति डोनाल्ड ट्रम्पले इरानलाई यदि इरानले संयुक्त राज्य अमेरिकामाथि आक्रमण गर्यो भने उसले अमेरिकी सेनाको पूर्ण शक्तिसहित जवाफी कारवाही भोग्नुपर्ने धम्की दिएका छन् ।

तेहरानका आणविक र गुप्तचर सुविधाहरूमाथि इजरायलको आक्रमणमा वासिङ्टनको कुनै संलग्नता नरहेको उनले आइतबार दोहोर्याएका हुन् ।

तेहरानका अनुसार शुक्रबार बिहान सुरु भएको इजरायलको अपरेशनले इरानी आणविक र सैन्य ठाउँहरूलाई निशाना बनाएको छ भने यसमा शीर्ष सेना कमाण्डर र आणविक वैज्ञानिकहरूसहित दर्जनौँको मृत्यु भएको थियो ।

इजरायली प्रधानमन्त्री बेन्जामिन नेतन्याहुले आयातोल्लाह शासनको हरेक लक्ष्यमा आक्रमण गर्ने प्रतिज्ञा गरेका छन् भने इरानले घातक मिसाइल आक्रमणका साथ जवाफ दिएको छ ।

ट्रम्पले इजरायली अपरेशन सुरु हुनुअघि नै आफूलाई यसको जानकारी रहेको बताएका थिए । उनले आइतबार बिहान आफ्नो ट्रुथ सोसल प्लेटफर्ममा संयुक्त राज्य अमेरिकाको ‘आज राति इरानमाथिको आक्रमणमा कुनै संलग्नता छैन’ भनी दोहोर्याए ।

‘यदि इरानले हामीमाथि कुनै पनि रूपमा आक्रमण गर्यो भने अमेरिकी सशस्त्र बलको पूर्ण शक्ति र बल तपाईंमाथि यस्तो स्तरमा आइपर्नेछ जुन पहिले कहिल्यै देखिएको छैन’, उनले भनेका छन्, ‘हामी इरान र इजरायलबीच सजिलै सम्झौता गराउन सक्छौँ र यो रक्तपातपूर्ण द्वन्द्व अन्त्य गर्न सक्छौँ ।’

राष्ट्रपति ट्रम्पले शुक्रबार तेहरानलाई सम्झौता गर्न वा इजरायलबाट अझ क्रूर आक्रमणको सामना गर्न आग्रह गरेका थिए ।

आफ्नो पहिलो कार्यकालमा ट्रम्पले एकपक्षीय रूपमा संयुक्त राज्य अमेरिकालाई फिर्ता लिएपछि इरानसँगको ऐतिहासिक आणविक सम्झौता २०१८ मा ध्वस्त भएको थियो भने उनले इरानमाथि पुनः प्रतिबन्धहरू लगाएका थिए । उक्त सम्झौता पूर्वराष्ट्रपति बराक ओबामाको नेतृत्वमा भएको वार्तामार्फत भएको थियो ।