विराट कोहलीले गरे टेस्ट क्रिकेटबाट सन्यासको घोषणा

काठमाडौं । भारतीय क्रिकेटका स्टार विराट कोहलीले टेस्ट क्रिकेटबाट सन्यासको घोषणा गरेका छन् । उनले सोमबार टेस्ट क्रिकेटबाट सन्यासको घोषणा गरेका हुन् ।

कोहलीले टेस्ट क्रिकेटमा उत्कृष्ट प्रदर्शन गरेका छन् । विराट कोहलीले १२३ टेस्ट खेल खेलेका छन् र २१० इनिङमा ४६.८५ को औसतमा ९२३० रन बनाएका छन् । उनको उच्चतम स्कोर २५४ रन (नटआउट) हो ।

कोहलीले टेस्ट क्रिकेटमा ३० शतक बनाएका छन् र उनको नाममा ३१ अर्धशतक पनि रहेको छ । कोहलीले इन्स्टाग्राममा आफ्नो सन्यासको घोषणा गरेका हुन् ।

उनले आफ्नो पोस्टमा लेखेका छन्, ‘मैले १४ वर्षअघि पहिलो पटक टेस्ट क्रिकेटको लागि ब्यागी ब्लू लगाएको थिएँ, इमानदारीपूर्वक भन्नुपर्दा मैले कहिल्यै कल्पना गरेको थिइनँ कि यस (टेस्ट) ढाँचामा मेरो यात्रा यस्तो हुनेछ, यसले मलाई परीक्षण गर्यो, मलाई सुधार गर्यो र मलाई जीवनभर सम्झने पाठ सिकायो ।’

उनले लेखेका छन्, ‘सेतो जर्सीमा खेल्नु व्यक्तिगत रूपमा मेरो लागि विशेष रह्यो, लामो दिन र साना क्षणहरू जुन कसैले देख्न सक्दैन, तर सधैँभरि तपाईंसँगै रहनेछन् ।’

कोहलीले पोस्टमा लेखेका छन्, ‘यो ढाँचाबाट अलग हुनु मेरो लागि सजिलो छैन, तर यो निर्णय मलाई सही लाग्छ, मैले यो टेस्टमा मेरो सबै थोक दिएँ, र यसले मलाई आशा गरेको भन्दा बढी दियो ।’

उनले खेलप्रति हार्दिक कृतज्ञता व्यक्त गर्दै टेस्ट क्रिकेटबाट सन्यास लिइरहेको लेखेका छन् । उनले भने कि उनी मैदानमा रहेका सबै मानिसहरू र यस यात्रामा आफूसँगै रहेका सबैलाई पनि आभारी छन् ।

विराटले अन्तमा लेखेका छन्, म मेरो टेस्ट करियरलाई सधैँ खुशीका साथ फर्केर हेर्नेछु ।’