कृष्णलाई पुरुष सौन्दर्य प्रतियोगिताको उपाधि

काठमाडैँ । पुरूष सौन्दर्य प्रतियोगिता ‘म्यान अफ दि इयर नेपाल २०२४’ को पहिलो संस्करणको उपाधि रूपन्देहीका कृष्ण न्यूरेले जितेका छन् । मंगलबार सम्पन्न प्रतियोगितामा उनले टाइटल हात पारे । पछिल्लो समय अमेरिका बस्दै आएका न्यूरे यो प्रतियोगिताको लागि नेपाल आएर अडिसनमा सहभागी भएका थिए ।

ग्रान्ड फिनालेको लागि अन्तिम प्रतिस्पर्धामा छनोट भएका उत्कृष्ट २० सहभागीबाट विजेता घोषित गर्दा ‘टप फाइभ’ छानिएको थियो ।

विजेता बनेका न्यूरेले नगद पुरस्कार ७ लाख रुपैयाँ र विनर ट्रफी हात पारे भने थाइल्यान्डमा हुने ‘म्यान अफ दि इयर’ ग्लोबलमा नेपालको प्रतिनिधित्व गर्ने अबसर पनि आफ्नो पक्षमा पारेका छन् । विजेतालाई कार्यक्रमका ब्रान्ड एम्बास्डर तथा निर्णायक अभिनेता अनुपबिक्रम शाही, कोरियोग्राफर अभिनेता प्रशान्त ताम्राकार, कार्यक्रम निर्देशक संसद शाह र कार्यकारी निर्देशक स्वीकृति प्याकुरेल, निर्णायकद्वय राजभाइ सुवाल र करण वैधले पुरस्कारसहित ट्रफी प्रदान गरे ।

अन्तिम स्पर्धामा छनोट भएका ५ जनामा मस्कुलिन म्यान अफ दि इयरको उपाधि उत्सव श्रेष्ठले पाए भने माइन्डफूल म्यान अफ दि इयरको उपाधि प्रविण आचार्यले पाए । मोडर्न म्यान अफ दि इयर अभिमन्यू खड्का, मास्टरली म्यान अफ दि इयर अनमोल भण्डारी र म्यानली म्यान अफ दि इयरको उपाधि विजेता बनेका कृष्ण न्युरेले नै हात पारे ।

उत्कृष्ट २० मध्येको सब–क्याटेगोरीमा मस्ट ट्यालेन्ट प्रवेश डंगोल, पब्लिक च्वाइस् अनमोल भण्डारी, मस्ट फोटोजेनिक ऋतिक श्रेष्ठ र वेस्ट वाक विधामा ईश्वर छत्कुली उत्कृष्ट घोषित भए । देशका विभिन्न प्रमुख सहरहरूमा सम्पन्न अडिसनबाट छनोट भएका १०० भन्दा बढी सहभागीमध्ये अन्तिम स्पर्धामा चुनिएकाहरूबीच मंगलबार आयोजक संस्था यू क्यान फ्लाई फेसन प्रालीले फाइनल राउन्डबाट विजेता टुंगो लगाएको हो ।
कार्यक्रम सम्पन्नपश्चात कार्यकारी निर्देशक प्याकुरेलले नेपालको सर्वाधिक पुरस्कार राशि सहितको यो पहिलो प्रतियोगितालाई हरेक पक्षबाट सफल बनाउन सघाउने सम्पूर्णमा धन्यवाद दिँदै यो प्रकारको सफलताले भोलिको दिनमा थप उत्कृष्ट कार्यक्रम गर्ने ऊर्जा प्रदान गरेको बताइन् ।