इलाम । इलामको माङसेबुङ गाउँपालिका–२ का युवा खड्गबहादुर कार्कीलाई घरखर्च टार्न अरूको मुख ताक्नुपरेको छैन । पैसाकै लागि मजदुरी गर्नुपर्ने तथा साहुको भर पर्नुपर्ने बाध्यता पनी छैन । घरकै छेउको बारीमा सुरु गरेको व्यावसायिक अकबरे खेतीबाट गरेको आम्दानीले घरखर्च मज्जाले धानेको छ ।
वैदेशिक रोजगारीबाट फर्केर २ वर्षअघि ‘बताहा कृषि तथा नर्सरी फार्म’ दर्ता गरी व्यावसायिक अकबरे खेती सुरु गरेका कार्कीले वार्षिकरूपमा ३ लाख आम्दानी गर्दै आएका छन् । विदेशमा दुःख गर्दासमेत गतिलो आम्दानी हात पार्न नसकेका कार्कीलाई आफ्नै घरनजिकै सुरु गरेको व्यावसायिक अकबरे खेतीले विगतको दुःखका दिनसमेत बिर्साएको छ ।
कार्कीको फार्ममा हेरिरहुँ लाग्ने अकबरेको बगान छ । ‘गतवर्ष १ हजार बोटबाट ११ क्विन्टल अकबरे उत्पादन भएको थियो, पहिलो सिजनमा नै राम्रो आम्दानी प्राप्त भयो’, कार्कीले भने, ‘प्रतिकेजी २५० देखि ३०० रुपैयाँसम्ममा बारीमा नै बिक्री हुने भएकाले यस वर्षदेखि खेती विस्तार गरेको छु ।’
कार्कीले यस वर्ष ५ हजार बोट अकबरे रोपेका छन् । आफ्नै ४ रोपनी जग्गा र छिमेकीको ४ रोपनी जग्गा लिजमा लिएर ८ रोपनी क्षेत्रमा अकबरे खेतीको विस्तार गरेका हुन् । उत्पादिन अबकरे बिक्रीका लागि बजारको समेत चिन्ता नभएपछि खेती बिस्तार गरेको उनी बताउँछन् । ‘अकबरेको बजार राम्रो छ, नबिक्ला कि भन्ने चिन्ता छैन, बारीबाटै बिक्ने गर्दछ’, कार्कीले भने, ‘सबै खर्च कटाएर वार्षिक १० देखि १५ लाख रुपैयाँसम्म कमाई गर्ने लक्ष्यका साथ खेती बिस्तार गरेको छु ।’
‘२ वर्षसम्म यही बोटले उत्पादन दिन्छ, हरियो खुर्सानी दिनैपिच्छे पनि टिप्न पाइन्छ तर रातो (पाकेको) भने सातामा दुईपटक टिप्न सकिन्छ, १ हजार बोटबाट पहिलो टिपाईमा ३० र दोस्रो टिपाईमा २० केजी अकबरे उत्पादन हुन्छ’ कार्की भन्छन्, ‘यही अनुपातमा ५ हजार बोटबाट पहिलो टिपाईमा १५० र दोस्रो टिपाईमा १०० केजी अकबरे उत्पादन हुनेछ ।’
बिस्तार भएको नयाँ बोटबाट उत्पादन सुरु हुने क्रममा छ । पुरानो बोटबाट यो सिजनको जेठदेखि नै उत्पादन सुरु भइसकेको छ । लगाएको छोटो अवधिमै आम्दानी लिन सकिने र बजारको समेत अभाव नएकाले अकबरे खेतीबाट मनग्य फाइदा लिन सकिने उनको अनुभव छ । हरियो खुर्सानी प्रतिकेजी २५० रुपैयाँमा बारीबाटै बिक्री हुन थालेको छ । त्यहाँ उत्पादित अकबरे इलाम बजारसहित झापाको दमक र सुनसरीको इटहरीसम्मका व्यापारीले लैजाने गरेका छन् ।
२०६६ सालमा वैदेशिक रोजगारीको सिलसिलामा मलेसिया गएका कार्की २०७४ सालमा स्वदेश फर्किएका थिए । उनले विदेशमा बस्दा सिकेको, अनुभव गरेको र देखेको आधारमा स्वदेश फर्केर कृषि व्यावसायमा लागेको बताए । ‘मैले काम गर्ने कम्पनीको छेउमा कृषि फार्म थियो, बिदाको दिन फार्ममा गएर हेर्ने गर्दथे’, उनले भने, ‘त्यही देखेपछि नेपाल गएर यही गर्छु भन्ने अठोट लिएर फर्किएकाले कृषि कर्ममा लागेको हुँ ।’
सुरुमा थोरै लगानीमा आफ्नै बारीमा अकबरे खेती सुरु गरेका कार्कीले १० हजार बोट अकबरे बिस्तार गर्ने योजनामा रहेको सुनाए । उनको फर्ममा अबकरेका साथ टमाटर, भण्टा, बन्दा, कोपी, प्याज खेती तथा एभोकार्डो र कफीको विरुवासमेत उत्पादन हुँदै आएको छ ।
इलाम
प्रतिक्रिया