२० वर्ष सशस्त्र प्रहरीमा सेवा गरेका थापाकाे लाेभलाग्दाे पशुपालन

काठमाडाैं । तुलसीपुर–४ निवासी जितबहादुर थापा अवकाशप्राप्त सशस्त्र प्रहरी सहायक निरीक्षक हुन् । उनी २०७७ सालमा अवकाशपछि तुलसीपुर–४ बायोखोलामा बङ्गुर, बाख्रा र कुखुरापालन गरिरहेका छन् । उनले २५ वटा बङ्गुर, ४० वटा जति बाख्रा र एक हजार पाँच सय बढी ब्रोइलर कुखुरापालन गरेका छन् । करिब १० लाख लागतमा उनले व्यवसाय सुरु गरेका हुन् ।

स्थानीयस्तरमै स्वरोजगार बन्नुपर्ने भन्दै आफूले काम सुरु गरेको थापाले बताए । ‘धेरै मान्छे स्वदेशमा श्रम नगरेर विदेश जाने गर्छन्, तर यहाँ नै परिश्रम गरे प्रशस्त आम्दानी गर्न सकिन्छ’, उनले भने । उनले वार्षिक १५–२० लाख आम्दानी गर्दै आएको बताए ।

२० वर्ष सशस्त्र प्रहरी बल नेपालमा सेवा गरेका थापा सामाजिक सेवामा पनि उत्तिकै सक्रिय छन् । मूलपानी सामुदायिक वन उपभोक्ता समूहका अध्यक्षसमेत रहेका उनी भन्छन्, ‘मैले समाजको सेवा गर्ने प्रण गरेको छु, जागिरमा हुँदा शान्ति सुरक्षामा खटिएँ’, उनले भने, ‘अब समाजलाई सकेको सहयोग गर्छु ।’