गण्डकी । पर्यटन राजधानी पोखरामा नयाँ पर्यटकीय गतिविधिका रूपमा हाइग्राउन्ड एडभेन्चर्स नेपालले बुधबारदेखि सावर बञ्जी शुभारम्भ गरेको छ । पोखरा महानगरपालिका–२५ हेम्जामा विभिन्न साहसिक पर्यटकीय गतिविधि सञ्चालन गरिरहेकोमा कम्पनीले सावर बञ्जी पनि सञ्चालनमा ल्याएको संस्थाका निर्देशक तथा प्रमुख सञ्चालक अधिकृत दिनेश महर्जनले जानकारी दिए ।
‘हाइग्राउन्ड एडभेन्चर्स नेपालले सन् २०१२ देखि पोखरामा साहसिक पर्यटकीय प्रडक्टका रूपमा विभिन्न गतिविधि सञ्चालन सुरु गरेको हो’, उनले भने, ‘सुरुमा जिपलाइन मात्रै सुरु गरिएकोमा त्यसपछि बञ्जी, स्विङ र एटिभिलगायतका प्रडक्ट थपिएको हो ।’ साहसिक पर्यटकीय क्षेत्रमा यी गतिविधिको सञ्चालनले कुनै न कुनै रूपमा योगदान पुु¥याएको उनले बताए ।
सावर बञ्जी नेपालको पहिलो र एक मात्र भएको उल्लेख गर्दै निर्देशक महर्जनले यसमा रमाउन चाहने स्वदेशी तथा विदेशी पर्यटकले पानीको फोहरामा फरक अनुभव लिन पाउने जानकारी दिए ।
उनका अनुसार बञ्जीका क्रममा ८२ मिटर माथिबाट हामफालेका पर्यटक तल झरिसकेपछि पानीको फोहरामा रमाउन पाउनेछन् । यसका लागि आन्तरिक तथा बाह्य पाहुनाले प्रतिव्यक्ति ६ हजार ५ सय तिर्नुपर्नेछ । यो शुल्कमा भिडियो, फोटो र टिसर्ट पनि निःशुल्क उपलब्ध हुनेछ । एकदिनमा करिब ६० जना पर्यटकलाई सावर बञ्जीको अनुभव दिलाउन सकिने जनाइएको छ ।
हाइग्राउन्ड एडभेन्चर्समा शरद गोल्छा, भरत गोल्छा, अभिनव चुरिवाल र दिनेश महर्जनले संयुक्त लगानी गरेका छन् । सावर बञ्जी सञ्चालन गर्नका लागि मात्र थप करिब ५० लाख लगानी गरेको कम्पनीले हालसम्म यहाँ करिब ५० करोड गरिसकेको जनाएको छ ।
पर्यटन राजधानी घोषणा भएको पोखरा साहसिक पर्यटनको पनि आकर्षक गन्तव्य रहेको पोखरा पर्यटन परिषद्का अध्यक्ष पोमनारायण श्रेष्ठले बताए । पोखरामा पर्यटकको बसाईं लम्ब्याउनका लागि नयाँ पर्यटकीय गतिविधिका रूपमा सावर बञ्जी विशेष महत्वपूर्ण बन्ने अपेक्षा लिइएको उनले बताए ।
शुभारम्भका अवसरमा पर्यटनविज्ञ वासु त्रिपाठी, टान गण्डकी प्रदेशका अध्यक्ष धर्मराज पन्थी, नेपाल पर्यटन बोर्ड गण्डकी प्रदेश कार्यालयका बरिष्ठ अधिकृत कुन्दन मिश्र, नाट्टा गण्डकी प्रदेशका अध्यक्ष हरिराम अधिकारी, होटेल संघ पोखराका अध्यक्ष लक्ष्मण सुवेदीलगायतले पर्यटन राजधानी घोषित पोखरामा पर्यटकको बसाईं लम्ब्याउनका लागि पर्यटकीय गतिविधि बढ्नु जरुरी रहेको बताएका छन् । सावर बञ्जी पोखराका पर्यटकीय गतिविधिमा अर्को महत्वपूर्ण उपलब्धि भएको बताउँदै उनीहरूले व्यावसायिक सफलताको शुभकामना दिएका छन् ।
प्रतिक्रिया