काठमाडाैं । सशस्त्र प्रहरी बल नेपाल प्रधान कार्यालयमा सञ्चालन भएको ‘वरिष्ठ अधिकृत सम्मेलन, २०८०’ सम्पन्न भएकाे छ । यही चैत्र ४ गतेदेखि सुरू भएको सम्मेलनकाे गृहसचिव एकनारायण अर्यालले समापन गरेका हुन् ।
साे अवसरमा गृहसचिव अर्यालले कार्यक्षेत्रमा परिचालन हुने सशस्त्र प्रहरी कर्मचारीहरुको मनोवल उच्च बनाउनका लागि मन्त्रालयको तर्फबाट कुनै कसर बाँकी नराख्ने बताउँदै वरिष्ठ अधिकृत सम्मेलनबाट तयार भएका प्रतिवेदनहरुलाई कार्यान्वयनको लागि मन्त्रालय सकारात्मक रहेको बताए ।
उनले संगठनले बोकेको विशेष उद्देश्य, जिम्मेवारी, परिचालन, तौर तरिका, निर्णय, सीमा सुरक्षामा चाहिने आवश्यक उपकरण र संगठनको बृत्तिविकासमा आफु सदैव सकारात्मक रहेको उल्लेख गरे । विपद् व्यवस्थापनमा सशस्त्र प्रहरी बल नेपालले देखाएको तत्परता र निभाएको भूमिका समेतको प्रशंसा गरे ।
गृहसचिव अर्यालले सशस्त्र प्रहरी बल नेपालको बृहत्तर विकासको लागि ऐन कानूनको निर्माण गर्न आवश्यक रहेको, सीमामा रहेका बिओपीहरुको समस्याहरुबारे आफू जानकार रहेको बताए । उनले भने, ‘यस प्रकारको सम्मेलन संगठनको गतिशिलताको लागि अति आवश्यक रहेको र यसले कार्यशैलीमा प्रभावकारिता, कर्मचारीहरुमा सामिप्यता बढाउन सहयोग गर्छ ।’
उनले यस प्रकारका छलफलले कानूनी, व्यावहारिक, नीतिगत समस्याको पहिचान र समाधानमा सहयोग पुग्ने तथा आगामी दिनको कार्यसम्पादनमा थप प्रभावकारिता ल्याउने बताए ।
कार्यक्रममा सशस्त्र प्रहरी महानिरीक्षक राजु अर्यालले परम्परागत रुपमा संचालन गर्ने सम्मेलन मात्र नभई यस सम्मेलनमा साना–साना कुराहरुको समेत ध्यानमा राखी सुधार गर्नुपर्ने कानूनी ऐन, नियम, परिचालन लगायतका विविध विषयहरुमा गहन रुपमा छलफल भएको बताए । उनले संगठन विकासको निमित्त हामीले नै गर्नुपर्ने, कमीकमजोरी छन् भने सुधार गर्दै लगिनु पर्ने र सबैको संयुक्त कार्य नै संगठनको हितमा केन्द्रित हुनुपर्ने समेत बताए ।
कार्यक्रममा सशस्त्र प्रहरी अतिरिक्त महानिरीक्षकहरु नारायणदत्त पौडेल, चन्द्र प्रकाश गौतम, बंशिराज दाहाल लगायतले संगठनका विविध विषयमा भएको छलफलले समस्याको पहिचान र समाधानमा सहयोग पुग्ने बताए ।
कार्यक्रममा सबै बाहिनीका बाहिनीपति लगायत सशस्त्र प्रहरी बरिष्ठ अधिकृत तथा अधिकृतहरुको उपस्थिती रहेको थियो ।
प्रतिक्रिया