युवायुवतीदेखि वृद्धवृद्धासम्मको केन्द्र बन्दै ‘रत्नपार्क’

काठमाडौं । कुनैबेला अस्तव्यस्त फुटपाथ भएको क्षेत्रका रूपमा स्थापित रत्नापार्कको परिचय अहिले फेरिएको छ । काठमाडौं महानगरपालिकाले आर्थिक वर्ष २०७२÷०७३ मा करिब ८० लाखको लागतमा पुनःनिर्माण र व्यवस्थापन गरेपछि रत्नपार्कको मुहार फेरिएको हो । अहिले रत्नापार्कमा वृद्धवृद्धा घाम ताप्नदेखि युवायुवती तस्बिर खिच्न र रमाउन पुग्ने गरेका छन् ।

रत्नराज्य लक्ष्मी क्याम्पसमा अध्ययनरत विवेक अधिकारी रत्नापार्कभित्र घुम्न र तस्बिर खिच्न आएको बताउँछन् । ‘विद्यार्थी कार्ड देखाएपछि २० रुपैयाँमा पार्कभित्र छिर्न पाइन्छ, यहाँ आएपछि बाहिर निस्कन मन नै लाग्दैन’, उनी भन्छन् । यस्तै बागबजारमा बस्ने ६७ वर्षीय शुकदेव श्रेष्ठ पनि घाम ताप्नका लागि पार्कभित्र आएको बताउँछन् । ‘घरमा कति बस्ने, पार्कभित्र बस्ने ठाउँ पनि छ, घाम ताप्न पनि पाइयो, रुखबिरुवाको स्वच्छ हावा पनि खान पाइन्छ, त्यसैले फुर्सद भएको बेलामा रत्नपार्क आउने गरेको छु’, उनी भन्छन् ।

यस्तै असनका सानुकाजी ताम्राकार पनि घाम ताप्न र दिन काट्नका लागि रत्नपार्कभित्र आएको बताउँछन् । माथिका केही प्रतिनिधिमूलक पात्र मात्र हुन् दैनिक हजारौँ व्यक्ति रत्नापार्कभित्र घुम्न र आनन्द लिनका लागि छिर्ने गर्छन् ।

काठमाडौं महानगरपालिका अन्तर्गतको हरियाली प्रवद्र्धन आयोजनाद्वारा हाल सञ्चालनमा रहँदै आएको रत्नापार्कलाई शंखधर पार्कका रूपमासमेत चिनिँदै आएको छ । काठमाडौं महानगरपालिकाले २०७२ असार १५ देखि रत्नपार्क प्रवेशमा शुल्क लिने व्यवस्था गरेको थियो ।

महानगरपालिकाले रत्नपार्कबाट हाल वार्षिक झण्डै एक करोड आम्दानी गर्दै आएको छ । शंखधर उद्यान तथा रानीपोखरी एकाइ (रत्नापार्क)का प्रमुख उमेश भण्डारी रत्नपार्कबाट चालु आवको फागुन १४ सम्म ५७ लाख ९१ हजार ७ सय ६० रुपैयाँ शुल्क आम्दानी गरेको बताउँछन् ।

रत्नापार्कभित्र प्रवेश गर्नका लागि विद्यार्थीले २०, सर्वसाधारणले ३० रुपैयाँ शुल्क तिनुपर्ने हुन्छ । यस्तै व्यक्तिगत क्यामेरा लिएर भित्र प्रवेश गर्नेले एक सय, विदेशी पर्यटक जाँदा एक सय, दोहोरी गीत म्युजिक भिडियो सुटिङ गर्न जानुपरेमा पाँच हजार, विवाह फोटो सुटका लागि पाँच सय, व्यावसायिकरूपमा फोटो खिच्नेले १ हजार ५ सय र सांस्कृतिक पोसाक झल्काउन जानेले एक सय रुपैयाँ शुल्क तिनुपर्ने व्यवस्था रहेको छ ।

चालु आवको साउनदेखि पुस मसान्तसम्म रत्नापार्कमा ४२ हजार ६ सय ४२ विद्यार्थी, १ लाख २१ हजार ३ सय ९ सर्वसाधारण, ३ सय ३३ विदेशी पर्यटक, नौ म्युजिक भिडियो सुटिङ, ३ सय ८७ व्यावसायिक क्यामेरा, चार विवाह फोटो सुट र तीन सांस्कृतिक पोसाक झल्काउने व्यक्ति रत्नापार्कभित्र प्रवेश गरेका छन् ।

शंखधर उद्यान तथा रानीपोखरी एकाइ (रत्नपार्क) का अनुसार साउन महिनामा ३० हजार १ सय ४६, भदौमा २७ हजार १ सय ४३, असोजमा २२ हजार २ सय २९, कात्तिकमा १६ हजार २ सय ४५, मंसिरमा १९ हजार ८ सय ५०, पुसमा २४ हजार १ सय ८९, माघमा २६ हजार १५ र फागुन १४ गतेसम्म १६ हजार १ सय ४१ जना प्रवेश गरेका छन् ।

रत्नापार्कको सुरक्षाका लागि खटिएकी नगर प्रहरी नायब निरीक्षक ज्योति पोखरेल रत्नापार्कभित्र दैनिक आठदेखि १ हजार २ सय व्यक्ति घुम्न आउने गरेको बताउँछिन् । ‘सार्वजनिक बिदाको दिनमा दैनिक तीनदेखि चार हजारसम्म रत्नापार्क घुम्न आउनुहुन्छ’, पोखरेल भन्छिन् ।

रत्नापार्कभित्र मानिस घाम तापेर सुखदुःखका गफ गर्ने, स्कुलका विद्यार्थीले खेल्ने, युवायुवती फोटो खिच्न तथा रमाउनका लागि आउने गरेको उनको भनाइ छ । रत्नपार्कभित्र बस्नका लागि सेट बक्स र कुर्चीको व्यवस्था गरिएको छ । यहाँ सार्वजनिक शौचालयसमेत रहेको छ । यस्तै पार्कभित्र शंखधरको सालिक, पद्मरत्न तुलाधरको सालिक, युनिगार्डेनलगायत रहेको शंखधर उद्यान तथा रानीपोखरी एकाइ (रत्नपार्क) ले जनाएको छ ।