सन्दीप लामिछानेविरुद्धको मुद्दामा भएन अन्तिम फैसला

पीडित किशोरीको जन्मदर्ता पुनः प्रमाणीकरण गर्न आदेश

काठमाडौं । नेपाली क्रिकेट टिमका पूर्व कप्तान सन्दीप लामिछानेविरुद्धको बलात्कार मुद्दामा अन्तिम फैसला भएन ।

काठमाडौं जिल्ला अदालतले पीडित भनिएकी किशोरी गौशाला २६ को जन्मदर्ता प्रमाणपत्र पुनः प्रमाणीकण गर्न आदेश दिएको छ । यसअघि आजै सन्दीपविरुद्धको मुद्दामा अन्तिम फैसला आउने बताइएको थियो ।

तर, बिहीबार न्यायाधीश शकुन्तला कार्कीको इजलासले गौशाला २६ को जन्मदर्ता प्रमाणपत्र प्रमाणीकरण गर्न आदेश दिएको हो । यसअघि प्रमाणीकरण गरिएको भए पनि इजलासले पुनः गाउँपालिकाबाट प्रमाणीकरण गराउनका लागि आदेश दिएको हो ।

यसअघि, गत साउन ३२ गते नै अन्तिम सुनुवाइ हुने भनिए पनि त्यसदिन न्यायाधीश राजुकमार खतिवडाको इजलासले पीडित गौशाला २६ की आमाको उमेर एकीन गर्ने आदेश गरेको थियो । त्यसपछि भदौ १० गते नै उक्त मुद्दाको अन्तिम सुनुवाइ भनिए पनि हेर्न नभ्याइने सूचीमा परेको थियो ।