गोसाइँकुण्डमा तीन लाख २२ हजार ११५ रुपैयाँ भेटी संकलन

रसुवा । जनैपूर्णिमा पर्वको अवसरमा पवित्र तीर्थ गोसाइँकुण्ड पुगेका भक्तजनले मन्दिरमा चढाएको भेटी सार्वजनिक गरिएको छ ।

पुजारीबाट संकलन गरिएको भेटीलाई लाङटाङ राष्ट्रिय निकुञ्जका कर्मचारी र गोसाइँकुण्ड क्षेत्र विकास समितिका पदाधिकारीले धुञ्चे पुर्याई जिल्ला प्रहरी कार्यालयको रोहवरमा गणना गरी सार्वजनिक गरिएको हो ।

समितिका अध्यक्ष सञ्जिव डिएमले भेटी रू तीन लाख २२ हजार एक सय १५ संकलन भएको जानकारी दिए । गोसाइँकुण्ड पुगेका सबै यात्रु आ–आफ्नो गन्तव्यतर्फ फर्किइ तीर्थस्थल खुल्ला भइसकेको जिल्ला प्रहरी कार्यालयले जनाएको छ ।

मेला अवधिमा यात्रुबाट उत्पन्न फोहर व्यवस्थापनका लागि स्थानीय व्यवसायी र गोसाइँकुण्ड क्षेत्र विकास समितिबीच समन्वय भइरहेको बताइएको छ ।