पर्वतमा विद्युत सर्ट हुदाँ एकको मृत्यु ४ जना गम्भिर घाइते

पर्वत । जिल्लाको जलजला गाउँपालिकामा धाइरिङमा बिद्युत सर्ट हुदाँ एक जनाको मृत्यु भएको छ भने ४ जना गम्भिर घाइते भएका छन् । गाउपालिकाको वडा न ७ धाइरिङमा सोमबार विहान विद्युत लाइनको भोल्टेज नियन्त्रण भन्दा बाहिर जाँदा १ जनाको मृत्यु भएको हो ।

धाइरिङको धारापानी भन्ने गाउँमा विद्युत लाइनमा आएको समस्याका कारण बस्ती भरीका झण्डै २ दर्जन बढि घरहरुका मिटर बक्समा आगलागी भएको र ४ जना स्थानीय गम्भिर घाइते भएको घटनास्थल पुगेका जलजला गाउँपालिकाका अध्यक्ष राजु आचार्यले जानकारी दिए ।

आचार्यका अनुसार विद्युत लाइनको भोल्टेज नियन्त्रण भन्दा बाहिर गई घरहरुका मिटर बक्समा आगलागी भएको हो । विद्युत लाइन सट हुँदा दजनौं पशु चौपायाहरुको मृत्यु भएको छ भने स्थानीय पशु फार्ममा समेत आगलागी भएको अध्यक्ष आचार्यले जानकारी दिए ।

घटनाको थप क्षतिको विवरण प्राप्त हुन बाँकी रहेको छ । घाइतेहरुलाई उपचारका लागि अस्पताल लैजाने तयारी गरिएको अध्यक्ष आचार्यले जानाकारी गराए । घटनामा झण्डै ५० बर्षकी सिता केसीको मृत्यु भएको जिल्ला प्रहरी कार्यालयका प्रमुख डिएसपि शिवराज बुढाथोकीले पुष्टि गरे ।