शेखर कोइराला गुटको भेलामा गगन थापा गएनन्

काठमाडौं । नेपाली कांग्रेस नेता डा. शेखर कोइराला निकट नेताहरूको भेला बिहीबार भएको छ । केही बेरअघि बत्तीसपुतलीस्थित अनुपम फुडल्यान्डमा कोइराला पक्षीय नेताहरूको भेला सुरु भएको हो ।

तर, उक्त भेलामा कांग्रेस महामन्त्री गगन थापा सहभागी भएका छैनन् । डा. कोइरालाले बोलाएको भेलामा महामन्त्री थापा देखिन छाडेका छन् । वत्तीसपुतलीस्थित अनुपम फुडल्यान्डमा आज भएको शेखर गुटको भेलामा गगन देखिएनन् ।

शेखर कोइराला समूहबाट महामन्त्री निर्वाचित भएका थापा पछिल्लो समय कोइराला गुटको भेलामा उपस्थित हुन छोडेका हुन् ।

भेलामा डा. कोइराला, डा. रामशरण महत, दिलेन्द्रप्रसाद बडू, जगदीशनरसिंह केसी, सञ्जय गौतमलगायत सहभागी छन् । बडू देउवा सरकारका आपूर्ति तथा वाणिज्य मन्त्रीसमेत हुन् ।

यसअघि उनी रामचन्द्र पौडेल खेमामा थिए । कांग्रेसको १४औँ महाधिवेशनसम्म पनि उनी पौडेलसँगै थिए । यसअघि कोइरालाले बोलाएको भेला र बैठकमा उनी सहभागी हुने गरेका थिएनन् । तर, बिहीबारको भेलामा बडू पनि सहभागी भएका छन् ।

पार्टी सभापति शेरबहादुर देउवाको कार्यशैलीप्रति असन्तुष्टि जनाउँदै कोइरालाले आज आफूपक्षीय भेला राखेका हुन् । कांग्रेस महाधिवेशन भएको ६ महिनाभित्र केन्द्रीय विभागहरू गठन भइसक्नुपर्ने विधानमा व्यवस्था छ ।

कांग्रेसको १४औँ महाधिवेशन सकिएको ६ महिना पूरा भएको छ । तर, सभापति देउवाले विधानमा उल्लेख भएका २८ वटा विभाग गठन गरेका छैनन् ।

यसैगरी, कांग्रेस केन्द्रीय समितिको बैठक दुई–दुई महिनामा बस्नुपर्ने व्यवस्था छ । तर, चैतयता कांग्रेस केन्द्रीय समितिको बैठक बस्न सकेको छैन ।

कांग्रेसका भ्रातृ र शुभेच्छुक संस्थाको नेतृत्वमा संस्थापन पक्षले एकलौटी गरेको भन्दै कोइराला पक्ष असन्तुष्ट बनेको छ । यिनै विषयमा छलफल गर्न भेला बोलाएको कोइरालाले जानकारी दिए ।– न्युज कारखाना

प्रतिक्रिया