विद्युत् गृहको काम तीव्र गतिमा

कैलाली । राष्ट्रिय गौरवको रानी जमरा कुलरिया सिँचाइ आयोजनाअन्तर्गत जानकी गाउँपालिका–९ कटाक्षेमा निर्माणाधीन विद्युत्गृहको काम यही असार मसान्तसम्म सम्पन्न गर्ने गरी काम अगाडि बढाइएको छ । ४ दशमलव ७३ मेगावाट क्षमताको विद्युत् गृह निर्माणको काम सुयू टुन्डी जेभीले गर्दै आएको छ । सन् २०१७ सालमा योजनाको काम सम्पन्न गर्नुपर्ने भए पनि गत वर्षदेखि मात्र विद्युत् गृह निर्माणको कामले तीव्रता पाएको थियो । आयोजनाले गत आर्थिक वर्षसम्म जसरी पनि सम्पन्न गर्ने लक्ष्य लिएको भए पनि कोरोना संक्रमणका कारण निर्माणको काममा अवरोध हुँदा विद्युत् गृहको प्रवेशद्वारबाट वैशाखभित्रै पानी हाल्ने गरी काम अगाडि बढाइएको आयोजनाका सिनियर इन्जिनियर विराट ज्ञवालीले बताएका छन् ।

‘वैशाखमा पानी चलाउन सक्छौँ । त्यहीअनुसार निर्माणको काम अगाडि बढेको छ’, इन्जिनियर ज्ञवालीले भने, ‘विद्युत् उत्पादन भने असार मसान्तसम्म गर्ने गरी योजना बनाएका छौँ । आवश्यक सामग्रीहरूको आयात भइसकेको छ । अब जडान गर्ने काम हो । त्यसमा धेरै समय लाग्दैन ।’ उनले आयोजनाको ५० प्रतिशत काम सम्पन्न भइसकेको बताउँदै रानी जमराअन्तर्गतको काम करिब अन्तिम चरणमा पुगेको र कुलरियाअन्तर्गतको काममा ढिलाइ भएको बताए । इन्जिनियर ज्ञवालीले पुरानो स्टिमेटअनुसार १४ हजार ३ सय हेक्टर क्षेत्रफलमा सिँचाइका लागि आयोजनाले काम गरेको बताउँदै पछि १८ हजार हेक्टरमा सिँचाइ सुविधा पु¥याउने लक्ष्य लिएका कारण पनि काममा केही ढिलाइ भएको बताए । ‘टीकापुर क्षेत्रका काम अन्तिम चरणमा पुगेको छ । लम्की क्षेत्रमा भने धेरै काम गर्न अझै बाँकी छ’, ज्ञवालीले भने, ‘मुआब्जा र जंगल कटानीको प्रक्रियामा धेरै समय लागेका कारण पनि ढिलाइ हुन पुगेको हो ।’

सुयू टुन्डी जेभीका इन्जिनियर राज बस्नेतले विद्युत्गृहको ८५ प्रतिशत काम सम्पन्न भएको बताउँदै वैशाखसम्म विद्यृत्गृहका गेटबाट पानी सप्लाइ गर्ने गरी आयोजनाको काम अगाडि बढेको बताए । ‘आयोजना र हामीले संयुक्तरूपमा बसेर कामको योजना बनाउने गर्छौं र त्यही योजनाअनुसार हामीले काम गर्ने हो’, उनले भने, ‘असार मसान्तसम्म विद्युत्गृहको सम्पूर्ण काम सक्ने गरी काम गर्दै आएका छौँ । सम्भवतः असार मसान्तसम्म विद्युत् उत्पादन गर्न हामी सफल हुन्छौँ ।’ गत ११ मंसिरमा राष्ट्रिय योजना आयोगका सदस्य कृष्णप्रसाद ओली लगायतका टोलीले आयोजनाको अनुगमन गरेको थियो । अनुगमनमा ऊर्जा जलस्रोत तथा सिँचाइ मन्त्रालयका सचिव मधुसूधन अधिकारी, प्रधानमन्त्री विकास व्यवस्थापनविज्ञ गजेन्द्रप्रसाद थपलियालगायतको सहभागिता रहेको थियो । अनुगमनका क्रममा रानी जमरा कुलरिया सिँचाइ आयोजना प्रमुख केदार श्रेष्ठले वैशाखभित्र मूल नहरको औपचारिक उद्घाटन र असार मसान्तसम्म विद्यृत्गृहको उद्घाटन गरिने बताएका थिए ।