खोजखबर

क्वारेन्टाइनका भान्सेको मृत्यु, रिपोर्ट नआउँदै दाहसंस्कार

सौर्य अनलाइन २०७७ असार १५ गते ७:२३ मा प्रकाशित

बैतडी । क्वारेन्टाइनमा खाना पकाउने मृतक भान्सेको रिपोर्ट नआउँदै आइतबार दाहसंस्कार गरिएको छ। शनिबार मृत्यु भएका भान्सेको आइतबार घरपरिवारले नै दाहसंस्कार गरेका हुन्।

दशरथचन्द नगरपालिका– ६ का ५३ वर्षीय मृतक ती व्यक्ति वडा –४ मा रहेको जगन्नाथ बहुमुखी क्याम्पसको क्वारेन्टाइनमा दुई महिनादेखि भान्सेका रुपमा रहेका थिए।

शनिबार घरमै एक्कासी बिरामी भएर अस्पताल ल्याउँदै गर्दा बाटोमा मृत्यु भएका ती व्यक्तिको आइतबार दाहसंस्कार गरिएको प्रहरी नायब उपरीक्षक नारायणप्रसाद अधिकारी जानकारी दिए। जिल्ला अस्पतालमा शव परीक्षण गरी आफन्तलाई दासंस्कारका लागि दिइएको हो।

आवश्यक सुरक्षा सतर्कता अपनाएर सुरक्षितरुपमा परिवारका निश्चित मान्छे सहभागी भएर दाहसंस्कार गरिएको प्रमुख जिल्ला अधिकारी मोहनराज जोशीले जानकारी दिए। उनले भने, ‘रिपोर्ट आउन समय लाग्ने र पछि शव बिग्रने र घरपरिवारका मान्छेलाई पनि चिन्ता हुने भएकाले दाहसंस्कार गर्न लगायौं।’

शव परीक्षणका क्रममा यही कारण मृत्यु भएको भन्ने खासै केही पनि नदेखिएको जिल्ला अस्पतालका डाक्टर वसन्तराज जोशीले बताए। मृतकको कोरोना तथा पिसिआर परीक्षणको स्वाब संकलन गरी धनगढी पठाइएको छ। सो नगरपालिकामा हाल ३० जना कोरोना संक्रमित रहेका छन् भने जिल्लाभरि २३३ जनामा कोरोना पुष्टि भएको छ।

प्रतिक्रिया

पछिल्ला अपडेट्स

लोकप्रिय