आलु जोगाउन भण्डारण गृह

बागलुङ । गलकोट नगरपालिका–१ स्थित दुदिलाभाटी, भण्डारवनमा आलु भण्डारण गृह निर्माण गरिएको छ । बीउ जोगाउन र उपभोग्य आलु सुरक्षित राख्न सो गृह बनाइएको हो । प्रधानमन्त्री कृषि आधुनिकीकरण कार्यक्रमअन्तर्गत गलकोट नगरपालिका र कृषि ज्ञान केन्द्र पर्वतको आर्थिक सहयोगमा गृह निर्माण भएको हो । नगरपालिकाको दुई लाख, केन्द्रको पाँच लाख र एक लाख १४ हजार रुपैयाँ बराबरको जनश्रमदानमा गृह बनेको निर्माण समितिका अध्यक्ष राजेन्द्र कुँवरले बताए ।

गृह निर्माणले आलुखेतीको प्रवद्र्धनसँगै बजारीकरणमा टेवा पुग्ने विश्वास लिइएको छ । एकतले गृहमा १० टनसम्म आलु भण्डारण गर्न सकिने जनाइएको छ । भण्डारण गृह बनेपछि आलु किसान खसी छन् । घरमा राख्दा कुहिने, किरा लाग्नेजस्ता समस्या झेलेका किसानले अब सहजै आलु भण्डारण गर्न पाउँनेछन् ।

खेतबारीबाट झिकेको आलु लामो समयसम्म ताजा र सुरक्षित राख्न भण्डारण गृह उपयोगी मानिन्छ । संरचना बनाउँदा आलुका लागि तापक्रम अनुकूल हुने गरी निर्माण गरिन्छ । दुदिलाभाटीको भण्डारवन, ज्यामिरे, टोड्केलगायतका ठाउँमा बढी आलुखेती हुन्छ । ‘आलु खनेपछि लामो समयसम्म जोगाउनै गाह्रो थियो’, स्थानीय किसान हिराबहादुर किसानले भने, ‘अब किसानलाई सहज हुने भयो ।’

दुदिलाभाटीलाई आलुको ‘पकेट’ क्षेत्रका रूपमा विकास गर्ने लक्ष्य लिइएको छ । अहिले ५ सय रोपनीभन्दा बढी क्षेत्रफलमा आलुखेती हुँदै आइरहेको छ । ‘आलुको व्यावसायीकरणमा पनि भण्डारण गृहले सघाउँछ, यसबाट किसानले फाइदा लिन सक्नुपर्छ’, समितिका अध्यक्ष कुँवरले भने । जिल्लाको ताराखोला, ढोरपाटन, दमेक, धम्जालगायतका क्षेत्र आलुका लागि ‘पकेट’ मानिन्छन् ।