‘रातो टिका निधारमा’ को सुटिङ सम्पन्न

काठमाडौं । अशोक शर्माले निर्देशन गरेको चलचित्र ‘रातो टिका निधारमा’ को सुटिङ सकिएको छ ।

अभिनेत्री साम्राज्ञी राज्यलक्ष्मी शाह अभिनीत यो चलचित्र दशैंमा देशभर प्रदर्शनमा आउने तयारीका साथ २९ दिनमा छायांकन सकिएको निर्माण पक्षले जनाएको छ । यसै चलचित्रबाट निर्देशक शर्माले आफ्ना छोरा अंकित शर्मालाई नेपाली रजतपटमा डेब्यु गराउँदैछन् । काठमाडौं तथा झापामा छायांकन गरिएको यो चलचित्र शीर्ष गीत केही दिनमा सार्वजनिक गर्ने निर्देशक शर्माले जनाएका छन् ।

चलचित्रमा अभिनेत्री साम्राज्ञी र अभिनेता अंकितका साथमा अभिनेत्री नीता ढुंगाना, बुद्धि तामाङ, रवीन्द्र झा, वसुन्धरा भुसाल, खुश्बु खड्का, राजाराम पौडेल, लक्ष्मी गिरी, अरुणा कार्की, जयनन्द लामा, शिवहरि पौडेल, अर्जुन श्रेष्ठलगायतका कलाकारको अभिनय छ ।

चलचित्रमा शम्भुजित बाँस्कोटा र कल्याण सिंहको संगीत रहेको छ । त्यस्तै, वसन्त श्रेष्ठको कोरियोग्राफी, पुरुषोत्तम प्रधानको छायांकन, मित्रदेव गुरुङको सम्पादन तथा राजेश शाहको भिएफएक्स छ ।