समृद्धिलाई भाटभटेनीको साथ

काठमाडौं । समृद्धि स्कुल एन्ड कलेज र भाटभटेनी सुपर मार्केट एन्ड डिपार्टमेन्टल स्टोरबीच सम्झौता भएको छ । बुधवार भाटभटेनीका निर्देशक कल्याण गुरुङ र समृद्धि स्कुल एन्ड कलेजको महिला बास्केटबल टिम समृद्धि गोरिल्लाजका टिम म्यानेजर सन्तोष ताम्राकारबीच सम्झौता पत्र आदन प्रदान भएको छ ।

सम्झौताअनुसार भाटभटेनीले मुख्य प्रायोजन गरेबापत नगद तथा जिन्सी ५ लाख उपलब्ध गराउने छ । राजधानीमा जारी नेपाल बास्केटबल लिगमा समृद्धिले ‘भाटभटेनी समृद्धि गोरिल्लाज’ को नामले प्रतियोगिता खेल्ने छ । भाटभटेनीका निर्देशक गुरुङले हाम्रो संस्था खेलकुदसँग जोडिन पाएकोमा गौरवान्वित भएको बताए ।

निर्देशक गुरुङले नेपाली महिला बास्केबल टिमकी कप्तान समेत रहेकी भाटभटेनी समृद्धि गोरिल्लाजकी कप्तान सदिना श्रेष्ठलाई ट्रयाकसुट, जुत्ता र जर्सी प्रदान गरेका थिए । सम्झौता कार्यक्रममा समृद्धि स्कुल एन्ड कलेजका प्रमुख कार्यकारी अधिकृत नरेशप्रसाद श्रेष्ठ, प्रशिक्षक विकास शाहीलगायतको उपस्थिति रहेको थियो । जारी महिला राष्ट्रिय बास्केटबल लिगमा भाटभटेनी समृद्धि गोरिल्लाज चार खेलमा अपराजित रहँदै शीर्षस्थानमा रहेको छ ।