मुस्ताङका थकाली समुदाय फालो पर्व मनाउँदै

d':tfªsf] yf;fª ufpFkflnsf–@ sf]jfªdf ysfnL ;d'bfosf] df}nLs s'df/ ofqf -kmfnf]_ kj{ dgfOb} . ysfnL ;d'bfox?df s'df/x?nfO{ cfkmgf b]jtf g/LRofªjf]sf] cfzL{jfb lbnfpg x/]s jif{ kmfnf] kj{ dxTjsf ;fy dgfpg] u5{g . t:jL/ M  ;Gtf]if uf}td, DofUbL, /f;;

मुस्ताङ । मुस्ताङको थाक सात सय क्षेत्रअन्तर्गतको १३ गाउँ मुखिया थकाली समुदायको परम्परागत मौलिक पर्व कुमार यात्रा फालो मंगलबारदेखि शुरु भएको छ ।

थकाली समुदायको उद्गमस्थल थासाङ गाउँपालिका–२ कोवाङमा प्रत्येक वर्ष भाद्र महिनाको शुक्ल पक्ष अनुराधा नक्षत्रका दिनदेखि तीन दिनसम्म कुमारयात्रा पर्व मनाउने चलन छ । फालो पर्वको थासाङ गाउँपालिकाका अध्यक्ष वुद्धिप्रसाद शेरचनले उद्घाटन गरेका थिए ।

गौचन, तुलाचन, शेरचन र भट्टचन थरका थकाली समुदायका पाँचदेखि १३ वर्षमुनिका छेवार गरिसकेका कुमारलाई कुमार यात्रामा सहभागी गराउने चलन रहेको थाक क्षेत्रका संरक्षक हेमन्त गौचनले बताए ।

उनका अनुसार चारचनमा जन्मिएका छोराहरु कुमारयात्रा (स्योपेन) मा सहभागी भएपछि भगवान् नरिच्होबको आशीर्वादले जीवनका लागि सक्षम र योग्य भएको सांस्कृतिक मान्यता पाउँछन् ।

परापूर्वकालमा जंगलमा शिकार खेल्न गएका थकाली समुदायका युवाले मृगलाई मार्न खोज्दा नरिच्योहब देवता प्रकट भई नर्साङ भन्ने ठाउँमा लैजाने अनुरोध गरेअनुसार सो स्थानमा गुम्बा बनाई राखेपश्चात् गाउँमा अनिष्ट नहोस् भनेर पूजाआजा गर्ने र थकाली पुरुषले चुडाकर्म गरेपछि १३ वर्ष नपुग्दै अनिवार्य कुमारयात्रामा सहभागी हुने चलनको शुरुवात भएको स्थानीय अगुवाको भनाइ छ ।

स्योपेनमा सहभागी कुमारले टुकुचेको चोकोपानीमा स्नान गरेर नर्साङ गुम्बामा नरिच्योहेब देवताको पूजाआजा गर्ने, आफन्तजनबाट आशीर्वाद लिने, देवताको पूजाआजा गर्ने र थकाली भाषामा गीत गाउँदै बाजागाजासहित गाउँ परिक्रमा गरेर लार्जुङमा पुगेपछि घोडा चढेर राक्षसको चित्रलाई तिर हान्ने चलन छ ।

कुमार यात्रामा सहभागी हुन देश, विदेशबाट थकाली कुमार कोवाङमा आएका छन् । १३ वर्षीय छोरालाई स्योपेनमा सहभागी गराउन अमेरिकाबाट आएका मनोज भट्टचनले परम्परालाई निरन्तरता दिन फालोमा सहभागी भएको बताए ।

कुमारहरु थकाली भाषाको गीत गाएर थकाली पहिरनमा सजिएर नाचगानका साथै लामाले कोतघरमा पूजाआजा गर्छन् । तीन दिनसम्म यो पर्व मनाउने चलन छ । फालोको पहिलो दिन कोवाङका छ गाउँले सांस्कृतिक झाँकी प्रदर्शन गरेका थिए ।

फालो पर्व सञ्चालन गर्नका लागि थकाली सेवा समितिले स्थापना गरेको अक्षयकोषबाट थाक सातसय क्षेत्रका मुखियालाई आर्थिक सहयोग गरेको छ ।

अक्षयकोषको ब्याजबाट मुखियालाई एक लाख ३१ हजार सहयोग गरिएको समितिका अध्यक्ष कृष्णकुमारी शेरचनले बताए ।

परम्परागत संस्कृतिलाई निरन्तरता दिनका लागि अक्षयकोषको ब्याजबाट फालो पर्व सञ्चालनका लागि सहयोग गर्ने व्यवस्था मिलाइएको समितिका महासचिव नरेशकुमार तुलाचनले बताए ।

प्रतिक्रिया