ठूलो सपना छैन, भिडियोमै रमाउँछु

काठमाडौं : पछिल्लो समय म्युजिक भिडियोले मोडलिङ क्षेत्रको ग्ल्यामर पनि बढाएको छ । ठूला पर्दाका चलचित्रभन्दा यस्ता भिडियोतिर कलाकारको आकर्षण बढ्दो छ । यस्तै, आकर्षणमा परेका छन् कलाकार नारायण रिजाल ।
दर्जनौँ रेडियो तथा स्टेज नाटक एवं आधा दर्जनभन्दा माथिका चलचित्रमा सानोतिनो भूमिका निर्वाह गरेका रिजालले पछिल्लो समय राजेशपायल राईद्वारा स्वरबद्ध ‘हे कान्छी….उम्मेरैमा भट्टी धाइयो गीतको भिडियोमा मोडलिङ गरे । यसमा आºनो राम्रो अभिनय रहेको उनले दाबी गरे । दाङ घर भएका रिजालले कलाको औपचारिक शिक्षा लिएका छैनन् । तर, उनले ०५४ सालमा सुर्खेतमा कलाकार हरिहर शर्मासँग अभिनयको प्रशिक्षण लिएका थिए । त्यसैलाई आधार बनाएर उनले नेपाली चलचित्रमा खुट्टा टेकेका हुन् ।
‘राम्रो अभिनय गर्न सक्छु,’ रिजालले भने, ‘भनसुन गरिदिने व्यक्ति नहुनाले पछि परे ।’
उनका सहपाठी कमल गाउँ, मुनाल घिमिरे अहिले नेपाली चलचित्रमा नाम कमाएका कलाकारका रूपमा काम गर्छन् । चलचित्रमा काम गर्न अवसर प्रशस्तै पाए पनि भनेजस्तो रोल नपाउँदा क्षमता देखाउन नसकेर पछि परेको उनले सुनाए । कलाक्षेत्रमा नाम र दाम कमाउने भन्दै ०५० सालमा काठमाडौंमा आएका रिजाललाई काठमाडौंको शंखमूलमा खुलेको एक अभिनय प्रशिक्षण केन्द्रले रकम कुम्ल्याएर ठग्यो । प्रस्तोता उज्ज्वल केसीले खोलेको शंखमूलको ‘भिज्युलाइजर्स एक्टिङ इन्स्चि्युट’ नामक संस्थाले दुई महिनाको रकम लिएर फरार भएको रिजालले बताए । उनले भने, ‘सो संस्थाले दिएको रसिद आफूसँग अझै सुरक्षित छ ।’
संस्थाले ठगी गरेपछि रन्थनिएका रिजालले बिजुलीबजारमा रहेको निर्देशक प्रताप सुब्बाको ‘डायमन्ड एक्टिङ सेन्टर’मा गएर गुनासो गरेका थिए । सुब्बाले कलाकारिता क्षेत्रबारे शिक्षा दिएपछि शान्त भएर घर फर्किएको उनको स्मरण छ ।
कलाकारिता क्षेत्रमा लागेपछि श्रोताको मायाभन्दा अरू केही नकमाएको उनको भनाइ छ । ‘रकम त कमाउन सकिनँ,’ उनले भने, ‘कला क्षेत्रमा पनि राम्रोसँग जम्न सकिनँ ।’ ठूलो सपनाभन्दा पनि म्युजिक भिडियो र अन्य साना अभिनय गरेर यस क्षेत्रमा रहिरहने आºनो योजना रहेको उनले सुनाए । (सौस)