इरानको राजधानी तेहरान तत्काल खाली गरेर भाग्न त्यहाँका सबै बासिन्दालाई ट्रम्पको चेतावनी

कानानास्किस (क्यानाडा) । अमेरिकी राष्ट्रपति डोनाल्ड ट्रम्पले इरानको राजधानी तेहरान खाली गरेर भाग्न त्यहाँका बासिन्दाहरूलाई भाग्न चेतावनी दिएका छन् ।

इजरायली प्रधानमन्त्री बेन्जामिन नेतान्याहुले इरानमाथि व्यापक आक्रमण सुरु गरेपछि उनको आक्रमणलाई समर्थन गर्दै ट्रम्पले सोमबार त्यस्तो चेतावनी दिएका हुन् ।

‘सबैले तुरुन्त तेहरान छाड्नुपर्छ’, ट्रम्पले क्यानाडामा भएको जी–७ को शिखर सम्मेलनका क्रममा आफ्नो ट्रुथ सोसल खातामा लेखेका छन् । ट्रम्पले विस्तृत विवरण दिएनन् । इरानी राजधानीमा लगभग एक करोड मानिस बसोबास गर्छन् ।

इजरायलले इरानमा आक्रमणहरू बढाएको बेला ट्रम्पको यस्तो चेतावनी आएको हो । इजरायलले धर्मगुरुद्वारा सञ्चालित इरानको विवादित आणविक कार्यलाई नष्ट गर्ने लक्ष्य राखेको बताएको छ ।

इजरायली सेनाले यसअघि तेहरानको एउटा जिल्लाका बासिन्दाहरूलाई खाली गर्न आग्रह गर्दै सूचना जारी गरेको थियो । यो गाजामा यसको रणनीतिको प्रतिध्वनि हो । इजरायलले गाजामा सन् २०२३ अक्टोबर ७ को आक्रमणपछि अधिकांश प्यालेस्टिनी जनसङ्ख्यालाई विस्थापित गरेको छ ।

संयुक्त राज्य अमेरिकाले इजरायली सैन्य कारबाहीमा भाग लिने छ कि छैन भनेर भन्न ट्रम्पले बारम्बार अस्वीकार गरेका छन् । यद्यपि उनले अमेरिका प्रारम्भिक आक्रमणमा संलग्न नभएको बताए ।

यसअघि मंगलबार समाप्त हुने जी–७ शिखर सम्मेलनमा उनले पत्रकारहरूलाई भनेका थिए, ‘म यहाँबाट निस्किएपछि, हामी केही गर्न जाँदैछौँ, तर मैले यहाँबाट जानुपर्छ ।’