अमेरिकामा नेपथ्यको सानदार उपस्थिति

न्युयोर्क । विशाल ताल र हिउँ थुप्रिएका पर्वतहरूले घेरिएको मनमोहक सियाटलमा नेपथ्यले शुक्रबार सानदार उपस्थिति जनाएको छ । ब्यान्डले नयाँ–पुराना लोकरक गीत प्रस्तुत गरेर दर्शक–श्रोतालाई भरपूर मनोरञ्जन दिएको छ । सातौँ अमेरिका यात्रामा रहेको नेपथ्य सियाटलमा पहिलोपटक प्रस्तुत भएको हो । यस वर्षको अमेरिका यात्रामा भने ब्यान्डको यो दोस्रो सो हो । नेपथ्यले १ साताअघि टेक्सास राज्यको राजधानी अस्टिनमा पहिलो कन्सर्ट गरेको थियो ।

सियाटलको ‘मुर थिएटर’ का ढोकाहरू निर्धारितसमय अनुसार नै शुक्रबार बेलुकी ठिक ७ बजे खुला गरिएका थिए भने त्यसको १ घण्टापछि सो सुरु भएको थियो । नेपथ्यका मुख्य गायक अमृत गुरुङले गीत गाउँदा दर्शकले पनि सँगसँगै गाए, नाचे, रमाइलो गरे ।

संगीतमा रमाउने संसारभरिका श्रोता–दर्शकलाई नेपालीपनका माध्यमबाट जोड्दै आएको अग्रणी ब्यान्डलाई हेर्न यहाँ विभिन्न ठाउँबाट नेपाली ओइरिएका थिए । अमेरिकी सहरको कन्सर्टमा झुम्न क्यानडाबाट समेत नेपाली दर्शक आइपुगेका थिए । दर्शकमा नेपाली मात्रै थिएनन् । विदेशी अनुहारहरू पनि देखिन्थे । तिनैमध्येका थिए जोन सिमिङटन र कोल फोरम्यानको जोडी पनि थियो । भूकम्प गएका बेला एक अन्तर्राष्ट्रिय गैरसरकारी संस्थाको प्रतिनिधि भई नेपालको सेवामा लामो समय खटिएका जोनले नेपाली भाषा र संस्कृतिको पनि थोरै ज्ञान लिएका रहेछन् ।

‘मैले नेपथ्यबारे उतै थाहा पाएको थिएँ । त्यसपछि युट्युब र स्पोटिफाइमार्फत पछ्याउँदै आएको छु’, जोनले सुनाए, ‘यो ब्यान्ड सियाटलमै आउँदै छ भन्ने थाहा पाएपछि पार्टनरसमेत लिएर आएको हुँ ।’ कन्सर्टमा प्रस्तुत अधिकांश गीतमा सबैजसो श्रोताले साथसाथै गाइरहेको देख्दा असाध्यै रमाइलो लागेको उनले बताए ।
सुरुदेखि अन्तिमसम्मै रमाउने दर्शकको भिडमा मनिमा गुरुङ पनि थिइन् । कास्कीको लामाचौरबाट आएकी उनको बसोबास १० वर्षभन्दा बढी समयदेखि सियाटलनजिकै केन्टमा छ ।

‘नेपथ्यको कन्सर्ट हेर्ने सपना धेरै पहिलेदेखि थियो । अमेरिकामा आएर बल्ल पूरा भएकामा असाध्यै खुसी छु’, उनले भनिन्, ‘पहिलोपटक भएर पनि होला, स्टेजमा कलाकारहरू आएको देख्नेबित्तिकै शरीरभरि काँडा उम्रिएजस्तै भएको थियो ।’ कन्सर्टमै भेटिएका सुशील बोगटीले टाढाटाढाबाट दर्शक आएको देखेर अचम्म लागेको बताए । ‘ओरेगनदेखि आएको १ साथीलाई देखेर अचम्म मान्दै थप जिज्ञासा राखेको थिएँ’, उनी भनिरहेका थिए, ‘तर पछि यही सो हेर्नका निम्ति अझ क्यानडाका भ्यानकुभर, फिनिक्स, इदाहो र सेक्रिमेन्टोलगायत ठाउँदेखि आएका नेपाली भेटेपछि त झनै आश्चर्य लाग्यो ।’

कन्सर्ट अवधिभर मुख्य गायक अमृतले गाउँदै गरेका गीतहरू खोजी गर्दाको अनुभव पनि सुनाएका थिए । मुलुकको परिस्थिति र बिदेसिएका नेपालीसँग स्वदेशको अपेक्षाका विषयमा उनले प्रकट गरेका मन्तव्यलाई अन्यत्र जस्तै यहाँका दर्शकले पनि उत्तिकै मन पराए ।

मञ्चमा मुख्य गायक तथा अगुवा अमृतलाई ड्रमसेटमा ध्रुव लामा, बेस गितारमा सुविन शाक्य, गितारमा नीरज गुरुङ, मादलमा शान्ति रायमाझी र किबोर्डमा दिनेशराज रेग्मीले सघाएका थिए । टेक्सासको अस्टिन र वासिंगटन राज्यको सियाटलपछि तेस्रो प्रस्तुतिका निम्ति ब्यान्ड थोरै तल ओर्लिएर क्यालिफोर्नियाको लस एन्जलस सहर पुगेको हो । सिनेमा निर्माणका लागि विश्वमै अग्रणी मानिने हलिउड अटाएको यस सहरको ‘हाउस अफ ब्लुज’ मा मे २६ मा ब्यान्डले लोकरक गीत सुनाउनेछ । ब्यान्ड ३१ मेमा पेन्सिलभेनियाको पिट्सबर्ग, ७ जुनमा इलिनोइसको सिकागो, ११ जुनमा म्यासाचुसेट्सको बोस्टन र अन्त्यमा १४ जुनमा नर्थ क्यारोलाइना राज्यको ग्रिन्सबोरो सहर पुग्नेछ ।