कान्स फिल्म भेस्टिभलमा प्रदीप खड्का

काठमाडौँ । अभिनेता प्रदीप खड्का विश्वप्रसिद्ध ‘कान्स फिल्म फेस्टिभल’ मा सहभागी भएका छन् । फ्रान्समा आयोजना भइरहेको यो फिल्म फेस्टिभलमा प्रदीप चलचित्र ‘एक्लो’ लाई प्रतिनिधित्व गर्दै पुगेका हुन् । त्यहाँ उनले चलचित्रको प्रवद्र्धन गर्नेछन् । सँगसँगै उनी त्यहाँ कान्स कार्पेट र एक फ्रान्सेली चलचित्रको रेडकार्पेट प्रिमियरमा पनि सहभागी हुनेछन् ।

कान्सको ७८औँ संस्करणका लागि प्रदीप शनिबार राति नै फ्रान्स उडेका थिए । उनी अभिनीत चलचित्र ‘एक्लो’ कान्स मार्केट (मार्चे दु फिल्म) मा सहभागी छ । यो चलचित्रका निर्देशक प्रदीप शाही र निर्माताहरू स्टल खडा गरेर कान्स मार्केटमा सहभागी भएका छन् ।

यसबाहेक, थिएरी क्लिफा निर्देशित फ्रान्सेली भाषाको चलचित्र ‘ला फेम्मे ला प्लस रिच डु मोन्ड’ को रेडकार्पेट र स्क्रिनिङमा पनि प्रदीप सहभागी हुनेछन् । प्रदीपले त्यहाँ नेपालका छायांकन थलोको प्रवद्र्धनसमेत गर्नेछन् । यसका लागि उनले चलचित्र विकास बोर्डले तयार पारेका ब्रोसर त्यहाँ सहभागीलाई वितरण गर्नेछन् ।