लमजुङ बेसीशहरका सडक जीर्ण

लमजुङ । जिल्लाकै सबैभन्दा सुगम तथा सुविधा सम्पन्न सदरमुकामको बेसीशहर नगरपालिकाको सडक जीर्ण बन्दै गएको छ ।

सम्बन्धित निकाय तथा नगरपालिकाको बेवास्ताका कारण मर्मत नहुँदा रानीकुवा, मजुवाखेला नजिकैको सडक पुल, शेरा चोक, फुलबारी चोक, झिङ्गेखोला, ल्याण्ड स्टार साइट, घलेगाउँ चोकलगायत स्थानका सडक जीर्ण बन्दै गएको हो ।

अन्नपूर्ण पदमार्गको प्रवेशद्वारसमेत रहेको बेसीशहरको सडक जीर्ण हुँदा आन्तरिक तथा विदेशी पर्यटक, सवारी चालक, यात्रुदेखि स्थानीयवासीले समेत बढी सास्ती खेप्दै आएका छन् । रानीकुवा र मजुवाखोलाबीच भागको झण्डै ५० मिटर सडकको कालोपत्र गतवर्ष र यस वर्षको बाढीपहिरो भत्काएको छ ।

यहाँका केही भाग सडकसमेत बाढीले बगाएको छ । यसरी सडक जीर्ण बन्दै गए पनि मर्मत हुन नसक्दा पानी परेको बेलामा हिलाम्मे र अन्य बेला धुलाम्मे हुँदा सवारी साधनदेखि पैदल यात्रुसम्मलाई समस्या हुनथालेको छ । यही नजिकको मजुवा पुल समेत जीर्ण बन्दै गएको छ । उक्त पुल काटेपछि मुख्य बजारका सडकमा खाल्डैखाल्डा देखिन्छ ।

यहाँ वर्षा भएको बेलामा खाल्डाखुल्डीमा जमेको पानीले हिलो तथा पानी छ्याप्ने हुँदा समस्या हुने गरेको स्थानीयवासीको गुनासो छ । यस्ता खाल्डाखुल्डीले गर्दा सवारी साधनसमेत सहज रुपमा सञ्चालन गर्न समस्या हुने गरेको छ ।

सर्वसाधरण मात्र मात्र होइन यही बाटो हुँदै नगरप्रमुख, उपप्रमुख, प्रजिअ, जिल्लाका विभिन्न कार्यालय प्रमुख नियमित ओहोरदोहोर गर्ने गरे पनि यस विषयमा कुनै चासो नै दिइएको छैन ।

केही समयअघि शेरा चोकमा हिँड्दै गर्दा एउटा मोटरसाइकलले खाल्डोमा जमेको पानी शरीरभरी पारेर रुझाएको स्थानीयवासी लक्ष्मी श्रेष्ठले बताइन् । उनले भनिन्, ‘यहाँ एक दिन मात्र होइन वर्षाभएका बेलामा अन्य यात्रुलाई पनि जथाभावी सवारी चलाउनेले रुझाउने भएकाले डराइडराइ हिँड्नुपर्ने भएको छ ।’

चौतर्फी दबाबपछि नगरपालिकाले फूलबारी चोक तलदेखि कृषि ज्ञान केन्द्र कार्यालयबीच भाग सडकमा भने ढलान गरेको छ ।नगरपालिकाको पाँच लाख बजेटमा करिब २० मिटर सडक ढलान गरिएको हो ।

नगरप्रमुख गुमानसिंह अर्यालले भने, ‘नगरभित्रका सडक मर्मत गर्ने दायित्व हाम्रो भए पनि बजेट अभावले गर्दा केही गर्न सकेका छैनौँ ।’ नगरका पुराना सडक धेरै भत्किएका छन् । मर्मतका लागि करौडौँ लाग्ने भएकाले लागत अनुमान गरी पैसाको जोहो भएपछि मर्मत गरिने उनको भनाइ छ ।