पाँचथरमा मस्यौदा नै नहेरी राय सुझाव दिँदै

पाँचथर, ४ साउन । पाँचथरमा अहिले पनि संविधान–२०७२ को प्रारम्भिक मस्यौदाको प्रति पाउन नसकेको भन्दै नागरिकले गुनासो गरेका छन् ।

सरकारले प्रत्येक नेपालीको हातमा संविधानको खाका पु¥याउने भने पनि जिल्लाका नागरिकले अहिलेसम्म मस्यौदा पाउन नसकेको गुनासो गरेका हुन् ।

मस्यौदाको प्रति कम छापिएकाले प्रत्येक नेपालीको हातमा पुग्न नसकेको संविधान सुझाव समितिका प्राविधिक अधिकृत जीवन निरौलाले बताए ।

संविधानसभाले देशभरका लागि रु दुई लाख प्रति मस्यौदा किताब छपाइ गरे पनि छपाइ प्रक्रिया ढिला भएका कारण जिल्लामा पु¥याउन कठिनाइ भइरहेको संविधान सुझाव समितिले जनाएको छ ।

करिब दुई लाख जनसङ्ख्या भएको पाँचथरमा एक हजार ५०० प्रति मात्र मस्यौदा किताब आइपुगेको समितिका प्राविधिक अधिकृत निरौलाले जानकारी दिए । यसैबीच स्थानीयवासिन्दाले मस्यौदा नै नहेरी राय सुझाव दिनुपरेको गुनासो गरेका छन् ।

जिल्लाको क्षेत्र नम्बर १ स्थित गोपेटार उच्च मावि र क्षेत्र नम्बर २ को यासोकस्थित यासोक जनभवनमा आज संविधानसभा सदस्य तथा सुझाव समितिलाई मौखिक र लिखित सुझाव नागरिकले दिँदै छन् ।