नागढुंगा–सिस्नेखोला सुरुङमार्गलाई कलंकी–नागढुंगा सडकखण्डसँग जोड्ने प्रमुख लिंक रोड अहिले बिहानको समयमा मर्निङ वाक गर्ने सर्वसाधारणको आकर्षक गन्तव्य बनेको छ । सुरुङमार्ग अझै नियमित सञ्चालनमा नआएकाले सवारीसाधनको चाप न्यून हुँदा फराकिलो र सफा सडकमा दैनिक सयौँ स्थानीय तथा विभिन्न क्षेत्रबाट आउने सर्वसाधारण शारीरिक व्यायाम र हिँडडुलका लागि पुग्ने गरेका छन् ।
बिहान सबेरैदेखि नै लिंक रोडमा युवादेखि ज्येष्ठ नागरिकसम्मको उल्लेखनीय उपस्थिति देख्न सकिन्छ । कसैले दौडिने, कसैले छिटो हिँड्ने (ब्रिस्क वाक) गर्ने तथा कसैले समूहमा सामान्य व्यायाम गर्ने गरेका छन्। खुला वातावरण, कम सवारी आवागमन र व्यवस्थित सडक संरचनाका कारण यो क्षेत्र बिहानको समयमा सुरक्षित र सहज मर्निङ वाक स्थलका रूपमा स्थापित हुँदै गएको स्थानीय बताउँछन् ।
नागढुंगा–सिस्नेखोला सुरुङमार्गको प्रवेशद्वारसम्म पुग्ने यस लिंक रोडको मुख्य उद्देश्य सुरुङमार्गलाई त्रिभुवन राजपथ अन्तर्गतको कलंकी–नागढुंगा सडकसँग जोडेर सवारी आवागमनलाई सहज बनाउनु हो । सुरुङमार्ग सञ्चालनमा आएपछि यही सडकमार्फत सवारीसाधन सुरुङभित्र प्रवेश र बाहिरिने व्यवस्था हुनेछ ।
हाल सुरुङमार्ग सञ्चालनको अन्तिम तयारी भइरहेको अवस्थामा लिंक रोडमा नियमित सार्वजनिक सवारी सञ्चालन सुरु भएको छैन । यही कारण बिहानको समयमा सडक तुलनात्मक रूपमा शान्त रहने भएकाले सर्वसाधारणले यसलाई स्वास्थ्य प्रवर्द्धनका गतिविधिका लागि उपयोग गर्न थालेका छन् ।
स्थानीयका अनुसार राजधानीमा खुला र सुरक्षित रूपमा हिँडडुल गर्न सकिने स्थान सीमित हुँदै गइरहेका बेला फराकिलो सडक, स्वच्छ वातावरण र कम सवारी चापका कारण यो क्षेत्र मर्निङ वाकका लागि उपयुक्त विकल्प बनेको हो । विशेषगरी बिहानको चिसो मौसममा यहाँ आउनेको संख्या दिनप्रतिदिन बढिरहेको देखिन्छ ।
सुरुङमार्ग पूर्ण रूपमा सञ्चालनमा आएपछि भने यस सडकमा सवारीसाधनको चाप उल्लेखनीय रूपमा बढ्ने अपेक्षा गरिएको छ । त्यसपछि अहिलेजस्तो सहज रूपमा मर्निङ वाक गर्न सम्भव नहुने भएकाले धेरैले सुरुङ सञ्चालनअघि नै यस अवसरको उपयोग गरिरहेका छन् ।
नेपालकै पहिलो सडक सुरुङका रूपमा निर्माण गरिएको नागढुंगा–सिस्नेखोला सुरुङमार्ग सञ्चालनमा आएपछि काठमाडौं उपत्यका र देशका विभिन्न भागबीचको आवागमन थप सहज, सुरक्षित र समय बचत हुने विश्वास गरिएको छ। हालका लागि भने सुरुङमार्गसँग जोडिएको यो फराकिलो लिंक रोड बिहानको समयमा स्वास्थ्यप्रेमी सर्वसाधारणका लागि व्यायाम र मर्निङ वाक गर्ने उपयुक्त खुला स्थल बनेको छ ।
प्रतिक्रिया