महिला टी– २० विश्वकप एसिया छनोट : नेपाल सुपर ३ मा प्रवेश

काठमाडौं । आइसीसी टी– २० विश्वकप महिला एसिया क्षेत्र छनोटअन्तर्गत नेपाल सुपर ३ मा प्रवेश गरेको छ । आज शुक्रबार हङकङ र बहराइनबीच अन्तिम लिग खेल वर्षका कारण हुन नस्कदा नेपाल सुपर ३ मा प्रवेश गरेको हो ।

बिहीबारको खेलमा बहराइनलाई ६ विकेटले हराएसँगै नेपालको सुपर ३ मा पुग्ने सम्भावना जीवित भएको थियो । नेपालले ४ खेलमा २ जित, १ हार र १ रद्द खेलले ५ अंक जोड्यो ।

हङकङ र बहराइनको खेल वर्षाले रद्द हुँदा ४ खेलमा हङकङको पनि ५ अंक पुग्यो । तर नेपालले २ खेल जितेको र हङकङले मात्र १ खेल जितेका कारण नेपाल अंक तालिकाको शीर्ष स्थानमा रह्यो । बहराइनको ४ खेलमा २ अंक छ ।

छनोटमा सहभागी भएका ९ टिमलाई ३ समूहमा विभाजन गरिएको थियो । हरेक समूहको विजेता सुपर ३ मा प्रतिस्पर्धा गर्ने प्रावधान अनुसार नेपाल, यूएई र थाइल्यान्डले सुपर ३ खेल्नेछन् ।

सुपर थ्रीमा सबैले एक अर्कासँग १ पटक खेल्नेछन् भने पहिलो चरणको अंक पनि जोडिनेछ । शीर्ष २ टोलीले ग्लोबल छनोटमा स्थान बनाउने छ ।